Մասիսի շրջանի Այնթափ գյուղի 12-րդ փողոցի 10-րդ տան բնակչուհի Գյուլնարա Պետրոսյանն այսօր կառավարության շենքի մոտ էր եկել յոթ ամսական թոռնիկի, դուստրերի, հարսի և ամուսնու հետ:
«Առաջին լրատվական»-ի հետ զրույցում նա պատմեց, որ 2013-ի մայիսի 16-ի լույս 17-ի գիշերը իրենց տունը փողոցի կողմից տեղադրված անօրինական գազի խողովակի պատճառով պայթել է, ութ հոգանոց ընտանիքը հայտնվել է դրսում: Ի դեպ, նա նշեց, որ այդ խողովակը անօրիանական է եղել, բազմաթիվ խախտումներով է անցկացվել գետնի տակից:
«Տունն ամբողջովին տրաքել է, պիտանի չէ բնակության, հիմա ապրում ենք վարձով, բայց ամսի մեկից պետք է ազատենք, տանտերը գալու է: Դեպքից պատճառով 27 տարեկան տղաս հաշմանդամ դարձավ, միակ աշխատողը մեծ տղաս է, ամուսինս երկրորդ հկարգի հաշմանդամ է»,- ասաց Գյուլնարան՝ կառավարությունից պահանջելով առաջին հերթին տղային առողջություն, տունը, և այն, ինչ այրվել է:
Նա պատմեց, թե ինչպես է տեղի ունեցել պայթունը. «Գիշերը՝ ժամը 1-ի սահմաններում, տղաս վատ է զգացել, կրակայրիչը վառել է ծխելու, պայթյունը տեղի է ունեցել: Գազն արդեն լցված է եղել տունը, տեղի է ունեցել պայթյուն: Մենք բոլորս տանն էինք, հարսս էլ հղի էր այդ ժամանակ, քարերի տակից ենք հանել նրան»,- հուզված ասաց Գյուլնարան:
Նա պատմեց, որ մինչև պայթյունը մի քանի անգամ դիմել են Մասիսի գազի գրասենյակ, երկու անգամ բրիգադ է եկել, չի գտել գազի արտահոսքի աղբյուրը: Այն ժամանակ ասել են, որ գետնի տակից էլ գազի խողովակ կա, չեն ստուգել՝ պատճառաբանությամբ, որ այդ թվականին գետնի տակից խողովակ չեն անցկացնում, բոլորը վերևից է:
Հիմա արդեն հաստատվել է, որ խողովակը 11 սմ ճաք է ունեցել. «Գազի հոտը գալիս էր, կտրվում, հենց անձրև էր գալիս, այդ տեղը փակվում էր հողով, ու այդպես չէին գտնում, սակայն տեղ անելով՝ լցվել է դարպասի մոտի առաջին ննջասենյակը, որտեղ հիմա արդեն հաշմանդամ դարձած տղաս է եղել»,- շարունակեց պատմել Գյուլրանան:
«ՀայՌուսգազարդը» երեք միլիոն դրամ է փոխանցել, բայց ընտանիքը հազիվ պարտքերն է տվել:
«Տղաս վառվել է, աջ ձեռքը կոտրվել է: Բացի սպիներից, որ ունի, հոգեկանը, նյարդերը պետք է բուժել: Առողջ երիտասարդը վերածվել է չգիտենք ինչի: Մենք պահանջում ենք իր բուժումն ու մեր նորմալ տունը, կամ նորմալ փոխհատուցում»,- ասաց նա՝ հավելելով, որ իրենք «ՀայՌուսգազարդից» պահանջել են 30 մլն դրամ, սակայն նրանք գալիս-գնում են, ասում են՝ ձեր ուզածը շատ է:
Ընտանիքը հույս ունի, որ նորանշանակ վարչապետը կլսի իրենց ձայնը, այլապես չէին գա կառավարության մոտ:
