«Մամուլի հետ սուրճ» հաղորդման նոյեմբերի 20-ի հյուրը ԱԺ «Իմ քայլը» խմբակցության պատգամավոր Արմեն Փամբուխչյանն է։
Մեր զրուցակիցն անդրադարձավ նախօրեին Հանրապետական կուսակցության տարածած հայտարարությանը՝ առ այն, որ երբևէ վարչապետ Փաշինյանի հետ Սերժ Սարգսյանը որևէ պայմանավորվածություն չի ունեցել.«Ես կարծում եմ, որ իրենք գոնե այդ մասով ազնիվ են գտնվել, արձանագրել են փաստը և հերքել այդ լուրերը։Քանի որ իրենք բազմաթիվ մեղադրանքներ են մեր հասցեին հնչեցնում, որոնք իրականությանը չեն համապատասխանում՝ այդ հարցում եղել են ազնիվ»։
Ինչ վերաբերում է տարածված այն կարծիքին, որ իշխանությունները թույլ են տալիս, որ Սերժ Սարգսյանն ու նախկին համակարգի այլ ներկայացուցիչներ ակտիվ գործունեություն ծավալեն՝ նրանց ազատազրկելու փոխարեն, պատգամավորը պատասխանեց.«Մենք ոչ թե նստում մտածում ենք՝ թե ում պետք է թույլ տանք,ում՝ ոչ, ում պետք է ձերբակալենք և ում՝ ոչ, այլ պարզապես ցանկացած անձի անցյալում գործած հանցանքները վերհանում ենք։ Մեր իրավապահները կաշկանդված չեն այս կամ այն անձի դեմ քրեական գործ հարուցել, բայց մենք երբևիցե չենք ուղղորդում իրավապահ մարմնին։ Գործ «կարելու» ավանդույթ չկա ու քանի դեռ չկան բավարար հիմքեր քրեական գործ հարուցելու համար՝ այդ մարդիկ մնում են ազատության մեջ»։
Հարցազրույցն ամբողջությամբ՝ տեսանյութում
