Ստամբուլում պաշտոնանկ է արվել 80 ոստիկան և երկրի Ազգային հետախուզական ծառայության Ստամբուլի բաժանմունքի պետը՝ գրում է թուրքական Milliyet թերթը:
Պատճառը պետական պաշտոնատար անձանց հեռախոսազրույցների անօրինական գաղտնալսումն է:
Ավելի վաղ Թուրքիայի ՆԳՆ ղեկավար Էֆկան Ալան ասել է, որ հեռախոսազրույցների անօրինական գաղտնալսման կապակցությամբ 150 պաշտոնյա հեռացվել է տարբեր պետական կառույցներից:
Նրա խոսքով՝ միջոցներ են ձեռնարկվում ապօրինի գաղտնալսումների կազմակերպիչներին հայտնաբերելու ուղղությամբ:
Փետրվարի 25-ին Թուրքիայի ԶԼՄ-ները տեղեկություն տարածեցին, որ 2011-ին Salam ահաբեկչական խմբավորման դեմ Ստամբուլի դատախազության հակաահաբեկչական գործողության շրջանակներում գաղտնալսվել են մոտ 7 հազար մարդկանց հեռախոսազրույցներ՝ կապված ինչպես գործող, այնպես էլ ընդդիմադիր կուսակցությունների ներկայացուցիչների հետ, ինչպես նաև երկրի վարչապետի ընտանիքի անդամների հեռախոսային խոսակցությունները:
Դրանից հետո Թուրքիայի վարչապետ Էրդողանը հայտարարեց, որ հեռախոսային խոսակցությունների գաղտնալսման հետևում ԱՄՆ-ում գտնվող Թուրքիայի ամենաազդեցիկ հոգևոր առաջնորդներից մեկի՝ Ֆեթուլլահ Գյուլենի շարժման ներկայացուցիչներն են:
