ԲՀԿ նախաձեռնությամբ ոչ իշխանական չորս ուժերի «Նոր տնտեսական քաղաքականություն» համաժողովի ընթացքում Եվրոպայի հայկական միությունների ֆորումի (ԵՀՄՖ) նախագահ Աշոտ Գրիգորյանը հայտարարեց «իշխանափոխության անհրաժեշտության մասին»՝ քննադատելով ՊԵԿ նախագահ Գագիկ Խաչատրյանին, ով, ըստ նրա, Սերժ Սարգսյանի հրամանով փորձում է ճնշել գործարար միջավայրը:
«Պետք է օրակարգում առաջնահերթ խնդիր դրվի իշխանափոխության հարցը: Սա իսկապես հրաշալի քառյակ է, չփորձեք հիասթափեցնել 10 միլիոնանոց հայությանը»,- ասաց նա: Աշոտ Գրիգորյանը նաև հայտարարեց, որ ֆորումը կանգնում է քառյակի մեջքին:
ՀԱԿ ներկայացուցիչ Լևոն Զուրաբյանը նույնպես խոսեց իշխանափոխության մասին՝ ասելով. «Մենք պետք է մոռանանք այս իշխանության ներքին բարեփոխման ռեսուրսի մասին: Ոչ մի ռեսուրս չունի այս իշխանությունը»:
Ըստ նրա՝ երկրում տնտեսության վիճակը կարող է փոխել ժողովրդի վստահություն ունեցող իշխանությունը:
«Հրաշալի քառյակը այն գործիքն է, որը կարող է ապահովել քաղաքական ճեղքումը»,- հայտարարեց Զուրաբյանը:
