Միացյալ Նահանգներում 9-ամյա տղային մեղադրանք է առաջադրվել հինգ առաջին կարգի սպանությունների, ինչպես նաև հրկիզման համար: Ըստ CBS-ի՝ հետաքննությունը եզրակացրել է, որ այս տարվա ապրիլին Քայլ Էլվուդը դիտավորյալ հրդեհել է տունը, ինչի արդյունքում նրա ընտանիքի հինգ անդամներ այրվել են կենդանի կամ ծխի մեջ շնչահեղձ են եղել. Նրա 34-ամյա խորթ հայրը՝ Ջեյսոն Ուոլը, 69-ամյա մեծ տատը՝ Քեթրին Մուրեյը, հարազատ եղբայր և քույր մեկամյա Արիել և երկամյա Դեմիոն Ուոլը, ինչպես նաև երկամյա զարմիկը՝ Ռոուզ Էլվոդը:
Իլինոյսում դատական նիստի ընթացքում Քայլը լաց է եղել և շփոթված տեսք է ունեցել: Երբ նա նստած էր աթոռի վրա, ոտքերը հազիվ էին դիպչում հատակին:
Փաստաբանը ստիպված էր բացատրել որոշ անծանոթ պայմաններ երեխային: Տղային ուղեկցում էին հայրական տատն ու պապը, որոնք նրա խնամակալներն են:
Քայլի մայրը՝ Քեթի Էլվուդը, պնդում է, որ իր որդին հրեշ չէ, և մարդիկ սխալվում են նրա հարցում: «Այո, դա սարսափելի ողբերգություն էր, բայց դրա պատճառով դուք չեք կարող կոտրել նրա կյանքը … Նա սիրող տղա է և արժանի է երկրորդ հնարավորության: Ես նույնպես կորցրեցի ընտանիքս, բայց ես ներում եմ նրան: Ես սիրում եմ նրան՝ անկախ ամեն ինչից»,- ասել է նա:
Երկու երեխաներին կորցրած Քեթին նաև ասել է, որ իր որդու մոտ վերջին շրջանում ախտորոշել են շիզոֆրենիա, ինչպես նաև ուշադրության դեֆիցիտ, հիպերակտիվություն և երկբևեռ խանգարում:
