Կապանում նոյեմբերի 11-ին կայացած ուրանի հնարավոր շահագործման աշխատանքների դեմ հանրահավաքից հետո տեղական հասարակական կազմակերպությունները պատրաստվում են դատարան դիմել` կառավարության որոշումը չեղյալ համարելու համար: Այսօր Կապանի «Էկոլոգիական անվտանգության ապահովման և ժողովրդավարության զարգացման» ՀԿ իրավախորհրդատու Արթուր Ղազարյանը լրագրողներին տեղեկացրեց, որ այս պահին արդեն կոլեկտիվ դատական հայցին միացել են տասը հասարակական կազմակերպություն, բայց ըստ ամենայնի, դատական հայցը կներկայացնեն մյուս տարի: Նրա խոսքերով,մինչև վերջ գնալու են. տարածաշրջանում 99,9 տոկոսը դեմ է ուրանի ծրագրի իրականացմանը: Իսկ Էներգետիկայի և բնական պաշարների նախարարի այն հայտարարությանը, որ ինքը լինելով կապանցի` Կապանի վատը չի ուզի, պատասխանել է, որ եթե պատմությունը ուսումնասիրենք, միշտ էլ այդպես է. փափուկ բարձ են դնում մարդկանց գլխի տակ. «Ինչ կապ ունի` կապանցի եմ, ստեփանավանցի եմ, թե ղարաբաղցի, դա պատասխան չէ, նախարարի պաշտոնը ռեալ մասնագիտական պատասխանատվություն է ենթադրում»,-ասաց Արթուր Ղազարյանը: Իսկ թե ինչ վերաբերմունք ունի Քաջարանի պղնձամոլիբդենային կոմբինատը, Արթուր Ղազարյանը չգիտի, թեև ենթադրում է, որ եթե Քաջարանի ավագանու խորհուրդը ընդդիմացել է, կարելի է ենթադրել, որ դա ինչ-որ տեղ նշան է այն բանի, որ գործարանի տնօրինությունն իր կարծիքն արտահայտել է, թեև Արթուր Ղազարյանը նշել է, որ այսքան ժամանակ որևէ սյունեցի պատգամավոր չմիացավ իրենց, անգամ այն դեպքում, երբ նրանց գրավոր նամակ ուղարկվեց:
