Ճապոնիայի Նարուհիթո կայսրը հոկտեմբերի 22-ին պաշտոնապես հայտարարել Է իր գահակալության մասին՝ երկրի Սահմանադրությանը եւ կայսերական տան վերաբերյալ օրենքին համապատասխան: Նրա ուղերձը հնչել Է գահակալության արարողության ժամանակ, որն ընթանում Է Տոկիոյում։
«Ես գահ եմ բարձրանում Սահմանդրությանը եւ կայսերական տան մասին օրենքին համապատասխան: Անցկացնելով գահակալության արարողությունը՝ մենք այդ մասին հայտարարում ենք երկրին ու ամբողջ աշխարհին»,- ասել Է միապետը:
Արարողությանը մասնակցելու համար Ճապոնիա են ժամանել 174 երկրների ու տարածքների 400 ներկայացուցիչներ, ներառյալ 70-ից ավելի միապետներ ու պետությունների ղեկավարներ: Կայսրին շնորհավորելու են հրավիրված նաեւ ճապոնական հասարակության բոլոր խավերի մոտավորապես 1,6 հազար ներկայացուցիչներ՝ իշխանության օրենսդիր, գործադիր ու դատական թեւերի ղեկավարներ, կաբինետի անդամներ ու նախկին վարչապետներ, պրեֆեկտուրաների նահանգապետներ, գիտնականներ, մարզիկներ, գրողներ, գործարարներ:
Նարուհիթոն կայսեր լիազորություններն ստացել Է մայիսի 1-ին այն բանից հետո, երբ ապրիլի 30-ին հանգստի անցավ 85-ամյա Ակիհիթոն: Տակավին 2016 թվականին նա ցանկություն Էր հայտնել հրաժարվել գահից տարիքի կապակցությամբ: Ճապոնիայի օրենսդրությունը միապետից պահանջում Է իր պարտականությունները կատարել մինչեւ կյանքի վերջը։
