Երեկ «Ժառանգություն» կուսակցության վարչության նախագահ Րաֆֆի Հովհաննիսյանը, խորհրդարանական համանուն խմբակցության պատգամավոր Անահիտ Բախշյանը և վարչության անդամ Սուսաննա Բարխուդարյանը Մեծամորում հանդիպեցին Արմավիր մարզի քաղաքացիների հետ:
Հանդիպման սկզբում ԱԺ պատգամավոր Անահիտ Բախշյանը ներկայացրեց հաշվետվություն` տարածաշրջանից իրեն ուղղված դիմումներին տրված ընթացքների մասին:
Հավաքվածներին իր խոսքով դիմեց Րաֆֆի Հովհաննիսյանը` ասելով, որ քաղաքականությունը հենց այդօրինակ հաշվետվությունների և հարցուպատասխանների մեջ է: Եվ որ իշխանությունը նույնպես պետք է հաշվետու լինի ժողովրդի առջև: Պարոն Հովհաննիսյանը քաղաքացիներին հորդորեց մասնակից լինել իշխանության ձևավորմանը. «Ժողովուրդը ինքը պետք է որոշի, թե ինչ պետություն է ուզում, հավատա իր ուժերին. միայն այդ դեպքում կլինի քաղաքացու և երկրի հաղթանակը»:
Անդրադառնալով առկա ներքին և արտաքին խնդիրներին` Հովհաննիսյանը խոսեց կուսակցապետական ապօրինի հուշագրի, արցախյան դիվանագիտական գործընթացում հերթական հետքայլի, և արտագաղթը խթանող իշխանական քաղաքականության մասին:
Հարցուպատասխանի ժամանակ ներկաները հանդես եկան ելույթներով, բարձրաձայնեցին իրեց հուզող խնդիրների մասին, որոնց լուծման համար «Ժառանգություն» կուսակցությունը իր պատրաստակամությունը հայտնեց` անհրաժեշտ քայլեր ձեռնարկել և դրանք հնչեցնել բոլոր հնարավոր ամբիոններից: Ի դեպ, այսօր Անահիտ Բախշյանը Արմավիրի մարզպետի հետ կայանալիք հանդիպման ժամանակ կներկայացնի քաղաքացիներին հուզող հարցերը:
«Ժառանգություն» կուսակցության լրատվական ծառայություն
