Անցած շաբաթ կառավարության նիստում հաստատվեց «Դատաիրավական բարեփոխումների 2019-2023 թվականների ռազմավարությունը և դրանից բխող գործողությունների ծրագրերը»։ Վենետիկի հանձնաժողովի կարծիքում արդարադատության նախարարության մշակած Դատական օրենսգրքի փաթեթը գովեստի է արժանացել։
Ռազմավարությունում նախատեսված են ոչ միայն դատարանների արմատական փոփոխություններ, այլ ընդհանրապես դատական համակարգի բոլոր մարմինների։ Արդյունքում, ըստ ձեզ, դատական համակարգն ավելի արդար և հանրության կողմից ավելի վստահված կդառնա՞, թե՞ ոչ․ «Առաջին լրատվական»-ի հարցին արդարադատության փոխնախարար Ռաֆիկ Գրիգորյանը պատասխանեց․ «Կարծում եմ՝ այո։ Մենք մեր առջև դրել ենք հենց այդ նպատակը։ Ընդ որում, Վենետիկի հանձնաժողովի կարծիքում նշված է, որ այս նախագիծն ուղղված է դատավորների հաշվետվողականության ավելացմանը և դատական համակարգում կոռուպցիայի կանխարգելման ծրագրի իրականացմանը։ Այսինքն՝ ձեր հարցի պատասխանն արտացոլված է հենց առաջին նախագծում»։
Իսկ սա մեզ, գլոբալ առումով, ի՞նչ կտա․ «Առաջին լրատվական»-ի հարցին Ռաֆիկ Գրիգորյանը պատասխանեց․ «Վենետիկի հանձնաժողովի կարծիքն ուղղված է Դատական օրենսգրքի վերաբերյալ ներկայացված առաջարկություններին, ու այն մեզ մի քանի բան կտա։ Նախ՝ Վենետիկի հանձնաժողովի առաջարկների հիման վրա ավելի կկատարելագործենք փաթեթը, երկրորդ՝ հիմք կընդունենք, որ մեր կողմից ներկայացված առաջարկները համարվել են առաջադեմ և չեն հակասել եվրոպական որևէ չափանիշի։ Արդեն իսկ առաջարկների հիման վրա լրամշակված տարբերակը կներկայացնենք Ազգային ժողով»։
Փոխնախարարը նաև հավելեց, որ, այո, կան նաև քննադատական կարծիքներ այս նախագծի վերաբերյալ, և տարօրինակ կլիներ, եթե դրանք չլինեին։
Մանրամասները՝ տեսանյութում։
