Ֆրանսիայի իշխանությունները կապ են հաստատել Լիբիայում իշխող ռեժիմի հետ, որպեսզի քննարկեն Մուամար Քադաֆիի հեռանալու հարցը, սակայն լիարժեք բանակցությունները չեն վարում: Այս մասին France Info ռադիոկայանին ասել է Ֆրանսիայի արտաքին գործերի նախարար Ալեն Ժյուպեն:
«Լիբիայի ռեժիմը պատվիրակներ է ուղարկել ամենուր՝ Թուրքիա, Նյու Յորք և Փարիզ: Կապը հաստատված է, սակայն այսօր իրական բանակցություններ չեն վարվում: Մենք ընդունել ենք բանագնացների, որոնք մեզ ասել են՝ Քադաֆին պատրաստ է հեռանալ, եկե՛ք բանակցենք»,- ասել է Ժյուպեն:
Նա ասել է, որ Քադաֆիի վարչակազմը դեռ չի կատարել ՆԱՏՕ-ի ռազմական գործողությունները դադարեցնելու համար անհրաժեշտ պայմանները: Դաշինքն ակնկալում է, որ իրավիճակը կանցնի ՄԱԿ-ի վերահսկողության տակ այն բանից հետո, երբ զինվորականները կվերադառնան զորամասեր, իսկ Քադաֆին կհայտարարի քաղաքական և զինվորական լիազորություններից հրաժարվելու մասին:
Հիշեցնենք նաև, որ ռազմական գործողությունների դադարեցման մասին էր այսօր խոսել Ֆրանսիայի պաշտպանության նախարար Ժերար Լոնգեն, որն ապստամբներին կոչ էր արել ուղիղ բանակցություններ սկսել Քադաֆիի ռեժիմի հետ:
