Բելառուսի նախագահ Ալեքսանդր Լուկաշենկոն պատմել է, թե ինչպես է իմացել, թե ինչ է դարքնեթը: Այդ մասին խոսակցությունն առաջացել է Մինսկում ահաբեկչության դեմ պայքարի միջազգային կոնֆերանսի ընթացքում՝ փոխանցում է Tut.by- ն:
Ըստ նրա՝ եզրույթին ծանոթացել է բառացիորեն համաժողովի նախօրեին. Բելառուսի առաջնորդը կարդացել է իր ելույթի տեքստը, և հանդիպելով «դարքնեթ» բառին՝ նրա իմաստը հարցրել է կրտսեր որդուց՝ Նիկոլայից: «Նա ցնցեց ինձ. կետ առ կետ բացատրեց այն, ինչ ես ընդհանրապես չէի լսել: Եթե թմրանյութ կամ զենք ես ուզում գնել, դա այդ ցանցն է: Ես մտածեցի. «տղեկը, որ ինձ թվում էր՝ հեռու է դրանից, ինձանից լավ գիտի»,- ասել է Բելառուսի նախագահը` հավելելով, որ մտածելու բան ունի:
Այս կապակցությամբ Լուկաշենկոն բարձրացրել է ինտերնետի ազատության ապահովման հարցը: Նախագահի խոսքով՝ անհրաժեշտ է գտնել հաղորդակցման և խոսքի ազատության ու անպատիժ պահվածքի միջև եղած սահմանը: