«Հուլիսին միջազգային կազմակերպության կողմից արված հետազոտության արդյունքներով՝ առաջին և երկրորդ ընտրության դեպքում մենք ունենք «Իմ քայլի» համար 65 տոկոս ձայն: Եթե առաջիկա կիրակի տեղի ունենային ընտրությունները, ապա «Իմ քայլին» կընտրեր մարդկանց 65 տոկոսը: Այս առումով, այո, անկում կա, բայց ընդհանուր առմամբ 65 տոկոսը բավական բարձր ցուցանիշ է՝ նկատի առնելով, որ երկրորդ տեղում գտնվող քաղաքական ուժը՝ ԲՀԿ-ն, կոմուլյատիվ առումով կրկնակի պակաս ձայն կհավաքի»,- «Առաջին լրատվական»-ի հետ զրույցում ասաց սոցիոլոգ Արտակ Սաղաթելյանը՝ պատասխանելով հարցին, թե ինչպես են քաղաքական զարգացումներն անդրադարձել հանրության տրամադրության վրա:
Նրա խոսքով՝ երկու ընտրության արդյունքներով երրորդ տեղում կլիներ «Լուսավոր Հայաստան» կուսակցությունը՝ 4 տոկոս առաջին ընտրությամբ ընտրելու դեպքում և 19 տոկոս՝ երկրորդ ընտրությամբ:
Քաղաքագետ Նժդեհ Հովսեփյանը այս ցուցանիշները նորմալ է համարում. «Ընդհանրապես ընդդիմությունից իշխանություն դարձող ուժի վարկանիշը տատանվում է և բնականաբար պիտի իջնի: Կառավարման ընթացքում մենք կտեսնենք նաև դրա տատանումները՝ բարձրացումն ու անկումը»:
Մեր զրուցակիցը կիսում է վարչապետի կարծիքը՝ ասելով. «Եթե այսօր տեղի ունենային ընտրություններ, ապա նույն արդյունքը կլիներ, որովհետև շուրջ 20 տարի Հայաստանում այնպիսի իրավաքաղաքական ռեժիմ է եղել, որը բառի բուն իմաստով ժողովրդին հասցրել է այնպիսի աստիճանի, որ ցանկացած քաղաքական ուժի ձայն կտան՝ բացառությամբ նախկինների, և հատկապես այն ուժերին ձայն կտան, որոնք թույլ չեն տա նախկին համակարգի ռեստավրացիան»:
Քաղաքագետի խոսքով՝ նախկին իշխանության մնացուկները անընդհատ փորձում են «պատերազմել» ներկայիս իշխանությունների հետ, ինչը բնական է, քանի որ նրանք չեն պատրաստվում հաշտվել իրենց իշխանության կորստի հետ, ինչը պետք է բերի նաև ունեցվածքի կորստի, սոցիալական դիրքերի ու կապերի կորստի:
Հարցազրույցն ամբողջությամբ՝ տեսանյութում: