Հայաստանի Հանրապետության կողմից Ստամբուլյան կոնվենցիան (Եվրոպայի խորհրդի՝ «Կանանց նկատմամբ բռնության և ընտանեկան բռնության կանխարգելման և դրա դեմ պայքարի կոնվենցիան») ընդունել-չընդունելու հարցի հետ կապված թեժանում է բանավեճը: «Չեմ կարող դա բանավեճ անվանել,- թեմայի շուրջ «Առաջին լրատվական»- ի հետ զրույցում ասաց Աշխատանքի և սոցիալական հարցերի նախարար Զարուհի Բաթոյանը,- մի կողմից՝ մենք խոսել ենք կոնվենցիայի վավերացման անհրաժեշտության մասին, ինչպես նաև դրա դերի մասին՝ կանանց նկատմամբ բռնության և ընտանեկան բռնության կանխարգելման և դրա դեմ պայքարի ոլորտում, մյուս կողմից՝ հաճախ տեսնում ենք շահարկումներ, որոնք որևէ կերպ չեն առնչվում թեմային և որևէ աղերս չունեն կոնվենցիայի վավերացման նպատակների հետ: Կարծում եմ՝ ընդամենը թեմայի շահարկումներ են՝ տարբեր նպատակներով, առողջ բանավեճ չի եղել»:
Ըստ Զարուհի Բաթոյանի՝ շահարկման հիմնական նպատակներից է կառավարության դեմ քարոզարշավ իրականացնելը՝ «սորոսականներ, գրանտակերներ» համատեքստում: Նրա խոսքով՝ կառավարությունում աշխատող մարդկանցից շատերն իրավապաշտպաններ են, աշխատել են իրավունքի ոլորտում. «Սա նորություն չէ, և սա շահարկելն արդեն անլուրջ է»:
Անդրադառնալով դիտարկմանը, որ Փաստաբանների միությունը հայտարարել է «Ո՛չ Ստամբուլյան կոնվենցիային» նախաձեռնություն ստեղծելու մասին, նախարարը նշեց, որ մասնագիտական քննարկումները, որոնք ավելի շատ աշխատանքային են և նպատակ ունեն մտահոգությունները բարձրաձայնելու և հասկանալու, օգտակար են և կարևոր, բայց այն, ինչ կատարվում է դրանից զատ՝ ստորագրահավաք, երթեր՝ 2-3 հոգով, շահարկումներ են և անլուրջ են»:
Մանրամասն՝ տեսանյութում:
