Շատ հաճախ ուրիշ էթնիկ խմբի ներկայացուցիչներն ասես «նույն դեմքն ունեն»։ Եվրոպացիների համար, օրինակ, բոլոր ասիացիներն իրար նման են։ Ինչո՞ւ։
Սթենֆորդի և Կալիֆոռնիայի համալսարանների մասնագետների վերջին հետազոտությունները ցույց են տվել, որ առաջին հայացքից «օտարների» արտաքին անհատական տարբերություններն ընկալելու անընդունակությունը մեր ուղեղի հատկությունն է։
Գիտնականները հետաքրքիր փորձ են իրականացրել, որին մասնակցել է եվրոպոիդ խմբի 17 ներկայացուցիչ, որոնց ցույց են տվել մարդկանց լուսանկարներ, որոնք պատկանել են եվրոպոիդ և նեգրոիդ ռասաներին։ Միևնույն ժամանակ, կատարվել է ուղեղի սկանավորում։ Գիտնականներին հետաքրքրում էր գլխուղեղի կեղևի ակտիվությունը, քանի որ հենց դա է մշակում տեսած պատկերները։
Պարզվել է, որ տեսողական կեղևի գերզգայուն հատվածն այնպես է «տրամադրված», որ ճանաչի այն նույն ռասայի մարդկանց դեմքերի անհատական տարբերությունները, որին պատկանում է ինքը, իսկ ահա մյուս ռասայի մարդկանց դեմքերին այն ավելի քիչ է արձագանքում։
Գիտնականների խոսքով՝ սա բնածին մեխանիզմ է, որն ակտիվացել է տեսողական տեղեկատվության ամենավաղ փուլում։ Այս մեխանիզմը հեռավոր անցյալում բերել է էվոլյուցիոն օգուտ, բայց հիմա դրանից առանձնակի օգուտ չկա, ավելին՝ այն կարող է ընկնել նախապաշարմունքների հիմքում։
Ընդգծվում է, որ այդ մեխանիզմը կարելի է վերահսկել, եթե առկա են նպատակներ և մոտիվացիա։
