Տևական քննարկումների և բանավեճերի միջով անցած Հարկային օրենսգիրքն արդեն գործածության մեջ է: Իհարկե քաղաքական կոնսենսուս խորհրդարանում այս փաստաթղթի շուրջ չկայացավ, բայց դա արդեն անցյալ է, Հարկային օրենսգիրքն ընդունված է, և միայն ժամանակը ցույց կտա կատարված փոփոխությունների նշանակությունը Հայաստանի տնտեսական կյանքում:
Թեմայի շուրջ «Առաջին լրատվական»-ի հետ քննարկմանը մասնակցեցին Menu.am ընկերության հիմնադիր և տնօրեն Վահան Քերոբյանը, «Արտլանչ» ընկերության հիմնադիր Բակուր Մելքոնյանը և «Կարաս» ազգային սննդի ցանցի հիմնադիր Տիգրան Յուզբաշյանը:
Ի՞նչ է փոխել բիզնես կյանքում Հարկային օրենսգիրքը: «Դեռևս բան չի փոխվել մեր կյանքում, որովհետև ՀՕ-ն ամբողջ ուժով չի կիրառվում, բացի դրանից՝ էլեկտրոնային առևտրին վերաբերող մասով ոչինչ չի փոխվել, Հարկային օրենսգիրքն այդ մասով ժամանակավրեպ է: Մենք չենք ակնկալում, որ մեկ քայլով հրաշք տեղի կունենա, պրոցես է ընթանում, հուսով ենք, որ ԱԺ-ն և Կառավարությունը կգտնեն ոսկե միջինը, որը թույլ կտա Հայաստանում մրցունակ բիզնես և աշխատատեղեր ստեղծել: Կան բարելավումներ սոցիալական խմբերի համար…»,- նշեց Վահան Քերոբյանը:
«Նոր Հարկային օրենսգրքով նախատեսվում էր շրջանառության հարկը ռեստորանային ոլորտում բարձրացնել, ինչը լուրջ հարված կլիներ ոլորտում աշխատող ընկերությունների վրա, բայց պայքարից հետո որոշվեց թողնել նույնը: Իմ կարծիքով՝ դրական փոփոխություններ են արվում: Գործարարն ուզում է, որ պետությունն իր կողքին լինի, կարծում եմ այդպես էլ կլինի»,- նշեց Տիգրան Յուզբաշյանը: Վ. Քերոբյանը հավելեց, որ նախկինում ուժեղ ճնշում է եղել գործարարների վրա. «Նախկինում պետությունը այնպիսի օրենքներ էր սահմանել, որ գործարարին պատանդ էր պահում»:
«Հայաստանում գործող Հարկային օրենսգիրքը և հարկերն անհամեմատ ավելի ցածր են, քան այլ երկրներում, բայց կա կիրառման ձևի խնդիր»,- նկատեց Բակո Մելքոնյանը՝ հավելելով, որ արտերկրում գործարարին օգնում են սխալն ուղղել, իսկ այստեղ պատժում են. այսինքն՝ մոտեցումները տարբեր են:
«Սև փողերը» հիմա «սպիտակ» խողովակով լցվում են բյուջե»,- ընդգծեց Տ. Յուզբաշյանը:
Մանրամասն՝ տեսանյութում:
