Լևոն Մնացականյանը շաբաթներ առաջ նշանակվեց Արցախի ոստիկանապետ, իսկ օրերս Արշավիր Ղարամյանը նշանակվեց Արցախի Անվտանգության խորհրդի քարտուղար, վերջինս հայաստանյան հեղափոխությունից հետո հայտնի հանգամանքներում ազատվել էր Արցախի ազգային անվտանգության ծառայության պետի պաշտոնից: «Առաջին լրատվական»-ի հետ զրույցում, անդրադառնալով հարցին, թե այս նշանակումներով Արցախի իշխանություններն ինչ հաղորդագրություններ են հղում պաշտոնական Երևանին, Արցախի նախկին վարչապետ, «Ազատ հայրենիք» կուսակցության նախագահ Արայիկ Հարությունյանը նշեց. «Եկեք այդ նշանակումները չկապենք պաշտոնական Երևանի հետ. դա Ղարաբաղի ներքին խնդիրն է, և Ղարաբաղի նախագահը ունի այդ իրավունքները և լիազորությունները, նշանակումները պայմանավորված են ԼՂ հետագա անվտանգության կատարելագործմամբ: Որևէ հաղորդագրություն, ուղերձ՝ ուղղված Երևանին, չկա»:
Մեր զրուցակցի հավաստմամբ՝ Արշավիր Ղարամյանը հակակրանք չունի Հայասատնի ներկա իշխանությունների նկատմամբ. «Հակառակը՝ երբ որ եղել է Արցախի ազգային անվտանգության ծառայության պետ, բավական լավ հարաբերություններ է ունեցել հայաստանյան կոլեգայի հետ, այսօր էլ շարունակում է կապ պահպանել: Եթե մեկ-մեկ մտահոգություններ են հնչում, դա ուղղված է երկրի անվտանգությանը, ոչ թե քննադատություն է՝ ուղղված Հայաստանի ներկա իշխանություններին»:
Ինչ վերաբերում է ՀՀ նախկին իշխանությունների հետ Ա. Ղարամյանի հարաբերություններին, Ա. Հարությունյանը նշեց, որ նա եղել է Ս. Սարգսյանի և Ռ. Քոչարյանի մարտական ընկերը. «Նրանց շփումները բարոյական տիրույթում են, ոչ թե քաղաքական: Քաղաքական առումով Ա. Ղարամյանը շահագրգռված է Արցախի անվտանգության համակարգի կատարելագործմամբ և զարգացմամբ, և այդ հարցում մեծ է ՀՀ իշխանությունների դերը»:
Հակադարձելով Ռ. Քոչարյանի հայտարարությանը, թե Արցախը բեռ է ՀՀ իշխանությունների համար, Ա. Հարությունյանը նշեց, որ ՀՀ իշխանությունը Հայաստանի և Արցախի, հայ ժողովրդի անվտանգությունը համարում է գլխավոր արժեք և որևէ հակաքայլ չի արել. «Հակառակը՝ վստահ կարող ենք հայտարարել, որ ֆինանսական, մարդկային և քարոզչական ռեսուրսներ են օգտագործվում Արցախի անվտանգությունն ապահովելու, արցախյան խնդիրը միջազգային, բանակցային հանդիպումների ժամանակ ավելի շահավետ դիրքերով ներկայացնելու համար: Նաև Արցախի իշխանությունների կողմից բարձրացված սոցիալ-տնեսական հարցերին տրվում է դրական պատասխան: Արցախի և Հայաստանի իշխանությունների համագործակցությունն այսօր շատ բարձր հարթության վրա է, լավ հարաբերություններ են ձևավորվել»:
Մեր զրուցակիցը նաև ընդգծեց. «Համոզված եմ՝ Փաշինյանը հող հանձնելու ցանկություն և տրամադրություն չունի»:
Մանրամասն՝ տեսանյութում:
