Այսօր՝ հունիսի 25-ին, Ազգային ժողովը շարունակում է արտահերթ նիստի աշխատանքները: Այժմ քննարկվում է Արարատ Միրզոյանի ներկայացրած՝ ԱԺ կանոնակարգ սահմանադրական օրենքում լրացումներ կատարելու մասին օրենքի նախագիծը և կից ներկայացված օրենքների փաթեթը 1-ին ընթերցմամբ ընդունելու մասին հարցը:
«Լուսավոր Հայաստան» խմբակցության պատգամավոր Արման Բաբաջանյանը իր ելույթում հայտարարեց. «Տարօրինակ կերպով մենք կրկնում ենք Քենիայի սխալը. 2003 թվականին Քենիան գնաց հենց այս ճանապարհով: Նրանք որոշեցին անցումային արդարադատության իրենց քայլերը կատարել՝ դատավորների վեթինգ իրականացնել, որը կոչված էր արմատական վիրահատության ենթարկել դատական իշխանությանը: Մի քանի օրում հանձնաժողովը ներկայացրեց մի շարք դատավորների կոռուպցիոն կապերի մասին տեղեկություններ, երկրի Վճռաբեկ դատարանի նախագահը ցուցակում հայտնված դատավորներից հրապարակայնորեն պահանջեց երկու շաբաթվա մեջ առանց դիմադրության հրաժարական ներկայացնել կամ դադարեցնել պաշտոնավարումը՝ միաժամանակ նրանց զրկելով թոշակից: Իսկ հետո 1 տարի պահանջվեց, որպեսզի դատավորները վիճարկեն իրենց նկատմամբ կայացված որոշումները, և անխտիր բոլորը վերականգնվեցին իրենց պաշտոններում: Գործընթացը լայնորեն քննադատվեց վեթինգին քաղաքական միջամտության պատճառով: Այն ոչ մի կերպ չվերականգնեց դատական իշխանության նկատմամբ վստահությունը: Միայն 8 տարի անց՝ 2011 թվականին, Քենիայի նախագահը հրապարակեց օրենք դատավորներին և դատախազներին վեթինգի ենթարկելու մասին, և ստեղծվեց վեթինգի անկախ մարմին»:
Արման Բաբաջանյանը տարակուսեց. «Ինչո՞ւ ենք որոշել Քենիայի սխալ ճանապարհով գնալ»:
Մանրամասները՝ տեսանյութում:
