Այսօր՝ հունիսի 25-ին, Ազգային ժողովը շարունակում է արտահերթ նիստի աշխատանքները: Շարունակվում է Հարկային օրենսգրքում փոփոխություններ կատարելու մասին հարցի քննարկումը:
Ինչպես տեղեկացրեց «Լուսավոր Հայաստան» խմբակցության պատգամավոր Արկադի Խաչատրյանը՝ իրենց խմբակցությունը ներկայացրել է մեկ տասնյակից ավելի առաջարկներ, որոնցից ընդունվել է միայն 3-ը, այն էլ՝ մասամբ. «Ամենակարևորներից մեկը վառելիքի հարկային բեռի ավելացման անթույլատրելիությունն է: Ցավոք, թե՛ կառավարությունը, թե՛ քաղաքական մեծամասնության մեր գործընկերները չընդունեցին այս սկզբունքը, և առաջիկա տարիներին տարեկան 3 տոկոսով ավելանալու է ակցիզային հարկը բենզինի, սեղմված բնական գազի և դիզվառելիքի համար՝ իր սոցիալական և տնտեսական հետևանքներով»:
Խոսելով ներդրումային միջավայրի մասին՝ նա զուգահեռներ անցկացրեց հարևան պետության՝ Վրաստանի հետ. «Մենք առաջարկել էինք հրաժարվել շահաբաժնի հարկից, որպեսզի կարողանանք խթանել գործարարությունը և մրցակցել Վրաստանի հետ»:
Պատգամավորի խոսքով՝ մեծ անելիքներ կան վարչարարության հետ կապված. «Վրաստանը վստահում է իր գործարարներին: Վարչարարությունը այս նախագծով վերանայելու մեր առաջարկը ևս անտեսվել է»:
«Այս Հարկային օրենսգիրքը չի երաշխավորում այնպիսի ներդրումային միջավայր, որի պարագայում ներդրողը որոշում կկայացնի հօգուտ ՀՀ-ում ներդրումների կատարման: Մեզ պետք է նոր Հարկային օրենսգիրք: Դա է պատճառը, որ մենք դեմ ենք այս Հարկային օրենսգրքին»:
Մանրամասները՝ տեսանյութում:
