ԱԺ ԼՀԿ խմբակցության պատգամավոր Արման Բաբաջանյանը ֆեյսբուքյան իր էջում գրել է․
Հունիսի 20-ին Վաշինգտոնում Հայաստանի և Ադրբեջանի արտգործնախարարների հանդիպումից հետո ԵԱՀԿ Մինսկի խմբի համանախագահների տարածած հաղորդագրությունը կարելի է համարել հայտարարություն ոչնչի մասին։ Տարածված տեքստը որևէ օրգանական կապ չունի վերջին ամիսներին հակամարտության գոտում տեղի ունեցած իրադարձությունների ու զարգացումների հետ։ Խոսքը մասնավորապես վերջին ամիսներին Ադրբեջանի ակնհայտորեն կոշտացած հռետորաբանության ու դրանից բխող գործողությունների մասին է։
Արտգործնախարարների նախորդ հանդիպմանը հաջորդող ժամանակաշրջանում Արդբեջանը հասցրել է մի քանի խոշորամասշտաբ զորավարժություններ անցկացնել, այդ թվում՝ Թուրքիայի հետ Նախիջևանում անցկացված համատեղ զորավարժությունները, իսկ առաջիկայում պատրաստվում է մեծամասշտաբ զորավարժություններ կազմակերպել Պակիստանի հետ։
Այս իրադարձությունները, ինչպես նաև Ադրբեջանի նախագահի, պաշտպանության նախարարի և այլ պաշտոնյաների ռազմատենչ հռետորաբանությունը ցույց են տալիս, որ այդ երկիրն իրականում հակամարտության խաղաղ կարգավորման որևէ ցանկություն չունի և ինտենսիվորեն պատրաստովում է պատերազմի։ Դրա ապացույցն է նաև այդ երկրի ռազմական բյուջեն 5 տոկոսով ավելացնելու մասին նախօրեին Ալիևի կողմից հնչեցված հայտարարությունը։
Վերջին մեկ ամսվա ընթացքում Ադրբեջանի կողմից երկու հայ զինծառայողների սպանությունները դրա ևս մեկ վկայությունն են։ Ահա այս ամբողջ համատեքստի փոխարեն ԵԱՀԿ Մինսկի խմբի համանախագահները իրենց հայտարարության մեջ ընդամենը «ափսոսանք են հայտնում» վերջին շրջանում արձանագրված զոհերի կապակցությամբ՝ առանց կողմերից որևէ մեկին, տվյալ դեպքում Ադրբեջանին ուղղված հասցեականության։
Հայտարարության մեջ ոչինչ ասված չէ շփման գծում հրադադարի պահպանման պայմանավորվածությունների մասին, որևէ հղում կատարված չէ Ադրբեջանի համար կոնկրետ պարտավարություններ նախատեսող նախկին փաստաթղթերին։ Այլ կերպ ասած ԵԱՀԿ Մինսկի խմբի այս անբովանդակ հայտարարությունը կանաչ լույս է Ադրբեջանի համար ռազմատենչ հռետորաբանությունը շարունակելու ու դրանք ռազմական գործողություններով ամրապնդելու համար։
Մինսկի խմբի այս հայտարարությունը հայկական դիվանագիտության հերթական ձախողումն է, որը կարող է ողբերգական հետևանքների հանգեցնել առաջնագծում և տարածաշրջանում։