Ձաների 99 կողմ, 22 դեմ հարաբերակցությամբ Վահե Գրիգորյանն այսօր ընտրվեց Սահմանադրական դատարանի դատավոր։ Այդ պաշտոնում նրա թեկնածությունն առաջադրել էր նախագահ Արմեն Սարգսյանը: Թեմայի շուրջ «Առաջին լրատվական»- ի հետ զրույցում «Իմ քայլը» խմբակցության ղեկավար Լիլիթ Մակունցը նշեց, որ «Իմ քայլի» համար սկզբունքային է, թե ինչ արժեքներ պետք է դիտարկել ՍԴ դատավոր ընտրելիս. «Մեզ համար կարևոր է ոչ միայն իրավական պահանջներին համապատասխանությունը, այլ նաև թեկնածուի քաղաքացիական հետագիծը, և նաև այն, թե ինչպիսի արժեքային ուղենիշ է ունեցել թեկնածուն»: Մակունցի խոսքով՝ նախկինում առաջադրված թեկնածուներն այդ չափանիշներին չէին համապատասխանում:
«Կարծում եմ նաև հարցերից էին զգացվում, թե ինչ էին փնտրում պատգամավորները, որոնցից շատերը քաղաքացիական հասարակությունից են սերում… Մեզ համար չափազանց կարևոր է, որ դատական համակարգը լինի անկախ: Դատական համակարգը պետք է լինի անկախ, սկզբունքային և առաջնորդվի բացառապես օրենքներով»,- նշեց Լ. Մակունցը: Նա նաև հավելեց, որ Վահե Գրիգորյանի ընտրությունը չափազանց կարևոր քայլ էր, անկախ նրանից, թե առանձին խմբեր ինչպիսի արշավ էին կազմակերպում նախագահ Ա. Սարգսյանի և Վ. Գրիգորյանի դեմ:
«Իմ քայլը» խմբակցության ղեկավարի խոսքով՝ կարևոր է, որ ՍԴ-ում լինեն սկզբունքային, անաչառ մարդիկ, որոնք կառաջնորդվեն միայն օրենքի գերակայությամբ և որևէ ազդեցության տակ չեն ընկնի: «Վահե Գրիգորյանի մուտքը ՍԴ սկիզբ է լրջագույն ռեֆորմների, առնվազն ներսում լինելու են խմորումներ»,- նշեց Մակունցը՝ հավելելով, որ ռեֆորմները շատ կարևոր են համակարգի առողջացման համար:
Մանրամասն՝ տեսանյութում:
