ՌԴ Պետական դուման հունիսի 18-ին կայացած լիագումար նիստում ընդունել է օրենք ԽՍՀՄ-ի և ԱՄՆ-ի միջև Միջին և փոքր հեռահարության հրթիռների վերացման պայմանագրի գործողությունը դադարեցնելու մասին՝ տեղեկացնում է RIA Novosti-ն:
Ավելի վաղ ՌԴ-ի նախագահ Վլադիմիր Պուտինը Պետդումա էր ներկայացրել օրինագիծ ՌԴ-ի կողմից ՄՓՀՀՊ-ի գործողությունը դադարեցնելու մասին: Օրինագծին համապատասխան, նախագահին իրավունք է տրվում ընդունելու որոշում պայմանագրի գործողության վերականգնման մասին, հետևում է փաստաթղթի տեքստից: Վաշինգտոնը Պայմանագրից դուրս գալու ընթացակարգն սկսել է փետրվարի 2-ին:
ՄՓՀՀՊ-ի գործողությունը դադարեցնելու օրինագիծը հավանության էր արժանացել Պետդումայի միջազգային գործերի պրոֆիլային կոմիտեի, ինչպես նաև անվտանգության և պաշտպանության երկու կոմիտեների կողմից:
Այս տարվա սկզբին ԱՄՆ-ը հայտարարեց ՄՓՀՀՊ-ից միակողմանի կարգով դուրս գալու մասին՝ Ռուսաստանին մեղադրելով պայմանագրի երկարատև խախտման մեջ: Ռուսաստանի նախագահը փետրվարի 2-ին հայտարարեց, որ ՌԴ-ն հայելային պատասխան կտա ՄՓՀՀՊ-ից դուրս գալու ԱՄՆ-ի որոշմանը և նույնպես դադարեցնում է մասնակցությունը պայմանագրին:
Պետության ղեկավարը նշել է, որ Ռուսաստանը չպետք է և չի ներքաշվի Մոսկվայի համար ծախսատար սպառազինությունների մրցավազքի մեջ: Ըստ որում Պուտինը հավելել է, որ զինաթափման վերաբերյալ ՌԴ-ի բոլոր առաջարկությունները «մնում են սեղանին, և դռները բաց են», բայց պահանջել է այսուհետև ոչ մի կարգի բանակցություններ չնախաձեռնել այս խնդրի շուրջը:
