Հետևություններ չանելով պարգևավճարների հետ կապված տարեսկզբի աղմուկից, որոշ պաշտոնյաներ վերջերս կրկին իրենք իրենց պարգևատրել են։ Նրանց թվում են նաև որոշ մարզպետներ։ Ուշագրավն այս դեպքում այն էր, որ մարզպետներից միայն Լոռու մարզպետը՝ Անդրեյ Ղուկասյանն է որոշել, որ անկախ պարգևատրումից պետք է համառորեն հերքի այդ փաստը։
Բանն այն է, որ օրերս «Հետք» էլեկտրոնային պարբերականը փաստաթղթերով հրապարակեց, որ Լոռու մարզպետ Անդրեյ Ղուկասյանը, իր կարգադրությամբ, իրեն պարգևատրել է 496 հազար 50 դրամով: Ի դեպ, լրատվամիջոցի հարցմանը պատասխանել և դա հավաստող փաստաթղթերը լրատվամիջոցին տրամադրել էր հենց Լոռու մարզպետարանը: Բարձրացված աղմուկից հետո, սակայն, մարզպետը որոշել էր հերքել արդեն հայտնի փաստը Ֆեյսբուքյան իր էջում՝ գրելով հետևյալ մեկնաբանությունը. «Սև ուժերին սպասարկող մամուլում տեղ գտած հրապարակումերին ի պատասխան՝ հայտարարում եմ, որ պարգևատրում չեմ ստացել: Ավելին, այլևս չեմ ստանալու: Այսուհետ, բոլոր նման հրապարակումները ստահոդ են և ձեզ, իմ հարգելի լոռեցիներ, ապակողմնորոշելու և իմ նկատմամբ բացասական ֆոն ստեղծելու համար են: Ինձ համար Լոռու մարզպետի բարձր պաշտոնը զբաղեցնելը պատիվ է և պատրաստ եմ առանց աշխատավարձի ծառայել մեր մարզին:
Սիրում եմ բոլորիդ»:
Ի պատասխան այդ գրառման՝ «Լոռի» հեռուստաընկերության գլխավոր խմբագիր Նարինե Ավետիսյանը նույն գրառման տակ տեղադրել էր ապրիլի 12-ով թվագրված պարգևատրման կարգադրությունը և խնդրել բացատրել, թե այդ դեպքում դա ինչ է նշանակում։ Ի պատասխան՝ մարզպետը վիրավորել էր լրագրողին՝ գրելով. «Հարգելիս, դա նախորդ պարգևատրումն է՝ մարտ ամսվա, ի՞նչ կա չհասկանալու։ Ձեր ակտիվությունը ես պայմանավորում էի գարնան գալով, բայց հիմա ամառ է: Ես հասկանում եմ, որ ինձնով եք ապրում, ձեր ամբողջ օրը ինձնով եք լցնում, բայց ամեն ինչ սահմաններ ունի»:
Նարինե Ավետիսյանն «Առաջին լրատվական»-ի հետ զրույցում ասաց, որ մարզպետի վարքագիծը գնահատում է որպես պետական պաշտոնյային ոչ հարիր վարքագիծ և առաջիկայում պատրաստվում է դիմել պաշտոնատար անձանց էթիկայի հանձնաժողով։ «Առաջին հերթին ինձ համար անընդունելին այն է, որ նա լրատվամիջոցներին համարում է սև ուժերին սպասարկողներ։ Այսինքն՝ եթե իրեն առողջ, փաստարկված քննադատության են ենթարկում, ապա սև՞ ուժերին են սպասարկում։ Նա էլ ցանկացած ինֆորմացիայի տակ միանգամից գրում է, որ դա իրականությանը չի համապատասխանում՝ պատասխանատվությունից խուսափելու համար։ Նույնն էլ այս դեպքում է եղել, նա ինձ, ի պատասխան իմ փաստարկված հարցման՝ վիրավորական գրառմամբ է հանդես եկել։ Եթե ես չլինեի լրագրող, իմ ընկերները նրան այլ դաշտում կպատասխանեին, բայց, քանի որ ես լրագրող եմ, ես լրագրողական դիրքերում կմնամ»,- ասաց Ավետիսյանը՝ հավելելով, որ իր իրավաբան, պատգամավոր ընկերների հետ քննարկումների արդյունքում որոշել են դիմել բարձրաստիճան անձանց էթիկայի հանձնաժողով, որպեսզի մարզպետը ներողություն խնդրի լրագրողից։ «Եթե ինքը, իրենց հեղափոխական թիմը հեղափոխության արժեքներից են խոսում, ապա մարզպետի այս գործելաոճը չի տեղավորվում իրենց դավանած արժեքների մեջ։ Այսպիսի վարքագիծ անգամ հանրապետական նախկին մարզպետը չի դրսևորել, երբ ես նրան քննադատում էի»,- ասաց Ավետիսյանը։
Ինչ վերաբերում է դատարան դիմելուն, ապա լրագրողն ասաց, որ առայժմ կդիմեն էթիկայի հանձնաժողով, որից հետո, եթե հաջողության չհասնեն, նոր կմտածեն դատարան դիմելու մասին։
Խոսքի ազատության պաշտպանության կոմիտեի նախագահ Աշոտ Մելիքյանն «Առաջին լրատվական»-ի հետ զրույցում ասաց, որ Լոռու մարզպետը, որը, որ իրեն թույլ է տվել նման կերպ արտահայտվել լրագրողի մասին, պետք է պարզապես պաշտոնանկ արվի։ «Անցել են ժամանակները, երբ ցանկացած պաշտոնատար անձ կարող էր լկտիություն ցուցաբերել և դա մնար անպատիժ։ Նոր իրողությունների պարագայում պաշտոնատար անձինք շատ ավելի պարկեշտ վարքագիծ պետք է դրսևորեն, իսկ ով որ չի համապատասխանում այդ չափանիշներին, պարզապես պետք է դուրս մնա իշխանությունից։ Ցավալին այն է, որ մարզպետը նման կերպ է պատասխանում լրագրողին, երբ հրապարակումը փաստարկված է, համապատասխանում է իրականությանը, և ճիշտ հարցադրում է եղել մարզպետին։ Մարզպետը, եթե չի ընդունում իր ստորագրությամբ արձակված կարգադրությունը, ուրեմն դա փորձ է հանրության արջև թափանցիկ, հաշվետվողական լինելուց։ Ես իմ վրդովմունքն եմ հայտնում մարզպետի կողմից մարզային լրատվամիջոցի գործադիր ղեկավարի նկատմամբ նման լկտի ենթատեքստ ունեցող արտահայտություն թույլ տալը»,- ասաց Մելիքյանը։
ԽԱՊԿ նախագահի խոսքերով՝ կառավարության ղեկավարը պարզապես պետք է նախաձեռնի մարզպետի պաշտոնանկ արվելու գործընթացը, զուգահեռաբար կարող են քննարկվել էթիկայի հանձնաժողով, ինչպես նաև դատարան դիմելու տարբերակները, որպեսզի մարզպետը ներողություն խնդրի լրագրողից նրան վիրավորելու համար։
