Ասենք, ԲՀԿ-ում մեկը հայտարարում է, որ Սերժ Սարգսյանի հրաժարականի պահանջ չեն հետապնդում, մյուսները և հատկապես գործարարները խուսափում են այդ մասին խոսելուց, երրորդները պնդում են, որ երբ ժամանակը գա, կքննարկեն այդ հարցը, ինչպես, օրինակ, Ռուստամ Գասպարյանը, ով վստահ է, որ «գործը» նախագահի հրաժարականին էլ կհասնի:
– Պարոն Գասպարյան, կարծես թե այնքան էլ հստակ չէ՝ Ձեր առաջնորդն ինչի՞ համար է «միասնականության» ձգտում, ի՞նչ եք պատրաստվում անել:
– Երկրի վիճակի համար, այսինքն՝ այս վիճակն ինչ-որ տեղ բարելավելու, այս վիճակից հանելու:
– Ինչպե՞ս եք դա պատկերացնում, քայլերի մասին կարծես ոչինչ չի ասվում:
– Դե, քայլերը դեռ քննարկման փուլում են, թե ինչպես կարելի է, և դեռ վաղ է դրա մասին խոսելը:
– Խոսվում է կառավարությանն անվստահություն հայտնելու մասին, դա բավարա՞ր պայման է երկիրը, ձեր ասած՝ այս վիճակից հանելու համար:
– Դե գիտեք, երկրի տնտեսությունը ղեկավարում է կառավարությունը, չէ՞, ու էսօր եթե կառավարության կազմը նորմալ աշխատի, երկիրն էս վիճակի չի լինի: Նախագահն էսօր զբաղվում է արտաքին հարաբերություններով, երկրի արտաքին քաղաքականությամբ, տնտեսությունը վարչապետն է ղեկավարում, ու էսօր իրա թե թուլությունն ա, թե չգիտեմ ինչը, որ երկիրը բերել է էս վիճակին:
– Իսկ վարչապետին ո՞վ է ղեկավարում:
– Դե բնական է, որ նախագան է ղեկավարում: Դե, կա ղեկավար, կան կատարողներ, որոնք թերանում են իրանց աշխատանքում ու միանշանակ եթե թերանում են, պիտի հրաժարվեն այդ պարտականություններից:
– Հրաշալի քառյակի որոշ ներկայացուցիչներ այն կարծիքին են, որ պետք է «գլխից բռնել» և նախագահի հրաժարականի պահանջ դնել: Ի՞նչն է խանգարում ԲՀԿ-ին՝ «գլխից բռնել»-ուն:
– Ես չեմ իմանում իրանք ինչ են պահանջում:
– Հավատո՞ւմ եք, որ ԲՀԿ-ն կարող է նախագահի հրաժարական պահանջել, գործարարների կուսակցությունը դեմ դուրս կգա՞ իշխանությանը, թե՞ կառավարությանն անվստահություն հայտնելով հույսեր կան, որ պաշտոններ կտան ձեզ:
– Մինչև չգա այդ օրը, մենք չենք կարող ասել՝ կգա էդ օրը, թե չէ: Ամեն դեպքում, գործընթացներ են՝ արվում են: Ինչ վերաբերում է պաշտոններին, եթե մենք դրա կռիվը տայինք, ապա կանեինք ընտրություններից հետո, երբ առաջարկ եղավ կոալիցիա կազմելու: Եթե պաշտոնների ձգտեինք, անպայման կմտնեինք, կոալիցիա կկազմեինք ու ավելի շատ, քան նախկինում: Բայց ստեղ պաշտոնների խնդիր չի, այլ երկրի վիճակը կարգավորելու, ժողովրդին ինչ-որ ձև այս հոգսերը, կարիքները բարելավելու, այսինքն՝ տնտեսական վիճակը, նաև բարոյական վիճակն այսօրվա երկրի ինչ-որ տեղ փոխելու:
– Իսկ Սերժ Սարգսյանին դեմ դուրս գալու մասին չե՞ք ուզում պատասխանել:
– Դե, էսօր փաստ է, որ դուրս են եկել, չէ՞, արդեն մարդիկ իրանց աշխատանքից էլ չեն վախենում, մարդիկ իրանց բիզնեսից էլ չեն վախենում, որ ինչ-որ բան կկորցնեն, մարդիկ էսօր իրանց ամեն ինչը դրել են մի կողմ, ամենաշատ բան ունի կորցնելու պարոն Ծառուկյանը, բայց դե, դրել ա մի կողմ ամեն ինչը և էսօր երկրի վիճակով է մտահոգվում:
– Ի՞նչ է անում Ծառուկյանը, եթե խուսափում է նույնիսկ Սերժ Սարգսյանի իմպիչմենթի մասին խոսելուց:
– Դեռ նման հարց չի քննարկվել մեզ մոտ, միգուցե գա մի օր՝ էդ հարցն էլ առաջ տանենք:
Հարցազրույցն ամբողջությամբ կարդացեք «Հրապարակ» օրաթերթի այսօրվա համարում
Լուսանկարը՝ Hetq.am-ի
