Ավիատոմսերի քանակը միշտ եղել է զբոսաշրջության զարգացման առաջին և ամենակարևոր խնդիրը,- ասաց Green Way travel տուրիստական գործակալության տնօրեն՝ Շուշան Սարգսյանը։
Ըստ Շուշան Սարգսյանի Հայաստանի հանդեպ հետաքրքրությունը բավականին աճել է, սակայն չի կարող ասել այդ հետաքրքրությունը կապված է նախորդ տարի տեղի ունեցած քաղաքական իրադարձությունների հետ, թե ոչ։
«Մեր կազմակերպությունը սպասարկում է հիմնականում Եվրոպայից և Ռուսաստանից ժամանած զբոսաշրջիկների խմբերին։ Հիմնական խնդիրները զբոսաշրջիների հետ առաջանում են հանգստյան թեժ շրջանում, երբ միջին կարգի հյուրանոցները միշտ զբաղված են լինում, իսկ թանկարժեք հյուրանոցները շատ թանկ են լինում զբոսաշրջիկների համար։ Սակայն միևնույն է գտնում ենք խնդիրները լուծելու այլընտրանքային տարբերակներ»,- ավելացնում է Շուշան Սարգսյանը։
Տուրիզմի հայկական ֆեդերացիայի նախագահ՝ Մեխակ Ապրեսյանը ասաց, որ հյուրանոցների քանակը դեռ բավարարում է զբոսաշրջիկներին։
«Բավականին ակտիվ հյուրանոցաշինություն կա՝ և Երևանում, և մարզերում։ Մինչև հեղափոխությունը, իհարկե, որոշակի աշխատանքներ տարվել են զբոսաշրջության զարգացման համար, սակայն հեղափոխությունը էապես նպաստել է զբոսաշրջության զարգացմանը։ Հայաստանը աշխարհին ավելի ճանաչելի է դարձել։
Շատ կարևոր է ուշադրություն դարձնել մրցակցային միջավայրին։ Մյուս կարևոր խնդիրներից մեկն է նաև ճանապարհների վրա անհրաժեշտ տեղեկատվական վահանակների բացակայությունը»,- ավարտեց Մեխակ Ապրեսյանը։
Զբոսաշրջիկները ասացին, որ իրենց դուր է գալիս այստեղ․ միայն դժգոհում են՝ շոգից, ճանապարհներից և փողոցում հանդիպող աղբից։
Մանրամասները տեսանյութում՝
