«Ժողովուրդ»-ի հետ զրույցում սփյուռքի նախարար Հրանուշ Հակոբյանն ասել, որ սիրիահայերին առնչվող քրեածին միջադեպերի հետ կապված ինքն անմիջապես զանգահարել է ՀՀ ոստիկանապետ Վլադիմիր Գասպարյանին, ով էլ գործերը վերցրել է իր հսկողության տակ:
Թերթը հիշեցնում է, որ 2013թ. դեկտեմբերի 27-ին Երևանում սիրիահայ ընտանիքի հոր, եղբայրների և «Մանանդ» տաքսի ծառայության հիմնադիր Քաջիկ Կարապետյանի որդու միջև վիճաբանություն էր տեղի ունեցել: Տաքսի ծառայության հիմնադրի որդին` Արթուրը, ընկերների հետ միասին դաժան ծեծի էր ենթարկել նույն հասցեում ավտոտեխսպասարկմամբ և պահեստամասերի վաճառքով զբաղվող Արմենակ Բրուտյանին և նրա երկու որդիներին: Խնդրի առնչությամբ Բրուտյանները նամակ էին գրել Սփյուռքի նախարարությանը և նշել, թե դժգոհ են հայաստանյան պայմաններից, ոստիկանության աշխատանքից:
Իսկ Արմավիրի մարզում էլ ինչ-որ մարդիկ հարձակվել էին ավտոմասերի վաճառակետի վրա ու սպառնացել սփյուռքահայ խանութպանին: Կռվի շարժառիթն ընդամենը 15 հազար դրամանոց կողպեքն էր եղել, որի հետևանքով Միշել Սարկոյանն ու ընտանիքի անդամներն անասելի վախեցել էին, երեխան նույնիսկ գիշերները չէր քնում:
-Տիկին Հակոբյան, ի՞նչ է արել նախարարությունն այս ընտանիքներին աջակցելու համար:
-Նախ՝ եկեք ընդունեք, որ մենք ոստիկանական ծառայությունում չենք աշխատում և երկրի ներքին կարգուկանոնի խնդիրները, կարծեմ, մեր նախարարության վրա դրված չեն: Եթե ինչ-որ տեղ վիճում են կամ խոսում, մենք չենք կարող բոլորի կողքին կանգնել և հասկանալ, թե ով ինչ է անում: Սակայն ես պետք է խորին շնորհակալություն հայտնեմ մեր հայաստանցիներին, որոնք այդքան գրկաբաց ընդունեցին սիրիահայերին, չնայած իրենք էլ ունեն դժվարություններ, շատերը հազիվ են ծայրը ծայրին հասցնում: Եվ պատահական չէ, որ սիրիահայերը հաճախ խոսում են հայաստանցիների բարյացակամ վերաբերմունքի մասին:
Սկզբնական շրջանում, երբ գործարարներին խնդրում էինք, որ սիրիահայերին աշխատանք տան, զգում էինք, որ լարվածություն կար ու նրանց աշխատանքի էին վերցնում պարզապես այն մղումով, որ տուժած են, պետք է օգնել: Այսօր արդեն գործարարներն իրենք են խնդրում, թե սիրիահայ կա՞, ուղարկեք, որ աշխատանք տանք, քանի որ սիրիահայերն աշխատանքի նկատմամբ հատուկ վերաբերմունք ունեն, նրանք աշխատասեր են, բանիմաց ու պատասխանատու:
Եթե հանցագործություն է կատարվել, ապա չէի ցանկանա, որ լրատվությունը սրի, և շեշտի հայաստանցի-սիրիրացի: Ի՞նչ տարբերություն: Բոլորս էլ հայ ենք: Ինչո՞ւ, չի՞ լինում այնպես, որ հայաստանցին հայաստանցու հետ կռիվ անի: Մյուս կողմից՝ այս դեպքերի մասնակիցները 2003, 2005թթ.-ից արդեն Հայաստանում են ապրում, և անհասկանալի է կատարվածը դիտարկել սիրիահայ և հայաստանցի հարաբերությունների հարթությունում:
Երկու դեպքի հետ կապված անմիջապես խոսել եմ ՀՀ ոստիկանապետ Վլադիմիր Գասպարյանի հետ, ով էլ գործերը վերցրել է իր հսկողության տակ: Մեկին հիվանդանոց էին տեղափոխել, որից անմիջապես հետո մեր աշխատակազմի ղեկավարն այցելել է հիվանդանոց: Ինչևէ, Բրուտյանների դեպքում կողմերը հաշտության ձեռք են մեկնել միմյանց, իսկ Արմավիրի դեպքը հսկողության տակ է:
