ՀՀ հատուկ քննչական ծառայությունը հաղորդագրություն է տարածել, ըստ որի՝ Մարտի 1-ի գործով Զաքար Հովհաննիսյանին դիտավորությամբ կյանքից զրկելու կասկածանքով ձերբակալվել է 2008 թվականին ոստիկանության շտաբի պետի պաշտոնը զբաղեցրած Գեղամ Պետրոսյանը։
Ըստ երևույթին, սա առաջին ձերբակալությունն է և առաջին կոնկրետ հաղորդագրությունը սպանությունների վերաբերյալ։ Մինչ այդ բաց էր մնում հենց կատարողների հարցը։ Առհասարակ, ինչպիսի՞ շղթայական էֆեկտ սա կարող է ունենալ, և արդյո՞ք սա չի փոխում կտրուկ իրավիճակը Մարտի 1-ի գործով «Առաջին լրատվական»-ի հարցին ԱԺ «Իմ քայլը» խմբակցության պատգամավոր Սիսակ Գաբրիելյանը պատասխանեց․ «Հարգելով անմեղության կանխավարկածը, այդ անձնավորությունը այս պահի դրությամբ դեռ կասկածյալի կարգավիճակում է։ Որքան հասցրել ենք ծանոթանալ՝ դեռ մեղադրանք չի առաջադրվել։ Բայց այս հայտարարության փաստը, ես կարծում եմ, որ ուշացած է առնվազն տասը տարի։ Հիմա մենք ունենք այս իրավիճակը։ Քննիչները պնդում են, որ այն բավական հիմնավորված է, և կարծում եմ, որ գուցե առաջիկայում հենց մեղադրանք առաջադրվի։ Եթե մեղադրանք առաջադրվի և օբյեկտիվ բազմակողմանի քննություն տարվի՝ կարծում եմ, որ ձեր ասած շղթայականին հնարավորություն ունենք հասնելու»։
Իսկ ԱԺ «Իմ քայլը» խմբակցության պատգամավոր Սուրեն Գրիգորյանն էլ ասաց․ «Մի իրավիճակ է, երբ չկան կոնկրետ կասկածյալներ կամ բերման ենթարկված անձինք, և այլ իրավիճակ է, երբ կա։ Իհարկե, բեկումնային փոփոխություն է։ Երբ նման անձ կամ անձինք կան, շղթայական էֆեկտի մասով պետք է նույնը ասեմ»։
Մանրամասները՝ տեսանյութում։
