ԱԺ ՀՀԿ խմբակցության ղեկավար Գալուստ Սահակյանը ոչ իշխանական ուժերի համախմբման գործընթացը դրական է համարում, թեև սկզբունքորեն դեռևս չգիտի՝ ինչի շուրջ են հավաքվում, ինչ սկզբունքներ ու ինչ ծրագրեր ունեն:
Մարտի 12-ին լրագրողների հետ զրույցում նա նշեց, որ դեռևս հանդիպումներ են հենց այդ նպատակով, թե ինչպիսի անհամաձայնություններ ձեռք կբերվեն, և ինչ քաղաքական որոումներ կկայացվեն: Հարցին՝ արդյոք վախ չկա՞ մեծամասնության մոտ, ՀՀԿ-ական պատգամավորը պատասխանեց, որ քաղաքականության մեջ վախկոտները տեղ չունեն:
«Քաղաքականության մեջ այդ բառն ընդհանրապես գոյություն չունի: Կարևորն այն է, որ բոլոր քաղաքական ուժերը քաղաքական դաշտում գործեն, յուրաքանչյուրն ունենա իր ուրույն դերակատարումը»,- ասաց նա:
Դիտարկմանը, թե՝ այն, որ ԲՀԿ-ն հանդիպում է մյուսների հետ, չի՞ նշանակում, որ լրիվ կտրվել են իշխանությունից, Սահակյանը ժխտական պատասխան տվեց, նշեց, որ դա ոչնչի մասին չի խոսում, որովհետև դեռևս ձևավորված չէ այն ծրագրային մոտեցումը, որ հանգույց կդառնա ոչ իշխանական ուժերի համագործակցության համար: Հարցին՝ արդյոք իշխող մեծամասնությունը դեռ համարում է, որ ԲՀԿ-ն իր հե՞տ է, խմբակցության ղեկավարը պատասխանեց. «Ես ոչինչ չեմ համարում, մեզ հետ ամբողջ ժողովուրդն է, որի հետևանքով մենք այստեղ ենք: ԲՀԿ-ն ոչ իշխանական ուժ է: Յուրաքանչյուր քաղաքական ուժ ունի իր ռազմավարությունը, և եթե դա համընկնում է որոշակի գործողությունների, կարող է բանակցել ու համաձայնության գալ ու որոշ իրողությունների մասնակից դառնալ»,- ասաց նա:
Անդրադառնալով ԲՀԿ առաջնորդ Գագիկ Ծառուկյանի արտահայտությանը, թե՝ դատարկ դհոլներ կան, որ սեպ են խրում, Սահակյանը դժվարացավ ասել՝ ում նկատի ուներ նա: «Ես բոլոր հարվածային գործիքներին չեմ տիրապետում: Դհոլը հին ազգային մշակույթ ունեցող գործիք է: Ինձ այլ գործիքների մասին մի հարցրեք, ես չեմ սիրում այդպիսի ենթատեքստով բառեր, երբ ես խոսում եմ, խոսում եմ մարդկանց ներկայությամբ, իրենց ճակատներին ու հետադարձ որոշումներ չեմ կայացնում իմ ասելիքն ամրապնդելու համար»,- ասաց նա:
Լուսանկարը` PAN Photo-ի
