Հանրաքվեի նախաշեմին Ղրիմի իշխանությունները փակել են օդային տարածքը: Սիմֆերոպոլի օդանավակայանն ընդունում է միայն ռուսական չվերթները՝ գրում է Kommersant-ը:
Թերթի աղբյուրների տվյալներով՝ գիշերը առանց ճանաչողական նշանների զինված անձիք զբաղեցրել են օդանավակայանի դիսպետչերական աշտարակը: Դեռ երեկ Սիմֆերոպոլի միջազգային օդանավակայանը սահմանափակել էր օդանավերի ընդունումը Կիևից և Ստամբուլից:
«Ուկրաինայի միջազգային ավիաուղիների» ինքնաթիռներից մեկը ստիպված է եղել վերադառնալ Կիև, քանի որ Սիմֆերոպոլում վայրէջքի թույլտվություն չի ստացել: Օդանավակայանն առանց որևէ խնդրի սպասարկում է Մոսկվայի Դոմոդեդովո և Շերեմետևո օդանավակայանների չվերթները: Ավելի վաղ օդանավակայանն ինքնաթիռների ընդունման հետ կապված խնդիրները պատճառաբանել էր եղանակային վատ պայմաններով:
Ղրիմի կառավարության աղբյուրը պարզաբանել է, որ հանրաքվեի նախաշեմին իշխանությունները վախենում են տարածաշրջանում սադրիչների հայտնվելուց: Հանրաքվեի անցկացումից հետո օդանավակայանը կընդունի օդանավերը սովորական ռեժիմով՝ հայտարարել է Kommersant-ի զրուցակիցը:
