Ուկրաինայի մաս լինելով՝ Ղրիմը նաև շահույթ կստանա առևտրային արտոնություններից, ինչը Եվրամիությունն առաջարկում է ուկրաինական իշխանություններին: Այս մասին գրում է ITAR-TASS-ը՝ վկայակոչելով առևտրի հարցերով եվրահանձնակատար Կարել դե Գյուխթին:
«Ղրիմն Ուկրաինայի մասն է: Այնպես որ՝ այն կշահի, քանի որ կազատվի մաքսերից: Սակայն, ինչպես նախկինում եմ ասել, մենք պետք է համոզվենք, որ հետևում են ապրանքների արտադրության կանոններին»,-հստակեցրել է նա:
Դե Գյուխթի խոսքերով՝ «խոսքը երրորդ երկրների՝ արտոնությունները չարաշահելու մասին է»:
«Այնպես որ՝ եթե ռուսական ապրանքները Ղրիմով հայտնվեն Եվրոպայում, ապա, իհարկե, դրանք կբացառվեն, սակայն եթե դրանք լինեն հենց ղրիմյան ապրանքներ, ապա կշահեն մաքսերի չեղյալ հայտարարումից»,- հստակեցրել է եվրահանձնակատարը:
