«Եվրամիությունը գտնվում է ճգնաժամային փուլում, եվրոպացիներն՝ իրենք էլ են դա ընդունում, բայց դա հաղթահարելի ճգնաժամ է, այն առաջացել է հիմնականում Միացյալ Թագավորության՝ ԵՄ-ից դուրս գալու որոշման հետ կապված, բայց միաժամանակ նաև ԵՄ ներսում ընթացող քաղաքական ուղղությունների վերաբերյալ առանձին երկրների տարբեր մոտեցումների հետ կապված»,- «Առաջին լրատվական»-ի հետ զրույցում ասաց Լեհաստանում ՀՀ արտակարգ և լիազոր դեսպան Սամվել Մկրտչյանը: Դիտարկելով Եվրախորհրդարանի ընտրությունները՝ դեսպանը նշեց, որ բարձր մասնակցությունն այդ ընտրություններին, վկայություն է այն մասին, որ եվրոպացիները շատ լուրջ են վերաբերվում ԵՄ-ին, նրա ճակատագրին, ապագային և փորձելու են ձեռնարկել ամեն բան, որպեսզի միությունը պահպանվի՝ իր զարգացման ուղենիշներով, իր հետապնդած նպատակներով: Իհարկե, այսպիսի բարդ և բազմանշանակ կառույցի առջև միշտ կանգնած են լինելու խնդիրներ, բայց դրանց հաղթահարման հաջող ուղիների որոնումը և ի վերջո դրանց գտնելը և համապատասխան լուծումներ տալը դրական ապագա են խոստանում»:
«Այս տարի նշում ենք Արևելյան գործընկերության տասնամյակը: Ընդհանուր գանահատկանը դրական է, առաջիկայում համագործակցությունը շարունակվելու է: Արևելյան գործընկերության 6 մասնակից երկրները, նաև ԵՄ անդամ երկրները պետք է ներգրավվեն քննարկումներում, թե Արևելյան գործընկերությունն ինչպիսի ապագա պետք է ունենա հաջորդ տասնամյակում, ինչպիսի ներքին ինտեգրացիոն գործընթացներ պետք է ձևավորվեն, ինչպիսի օրակարգ պետք է ձևավորվի և ինչպիսին պետք է լինի ԵՄ միասնական դիրքրոշումը… Պետք է ընդհանուր քննարկումների ընթացքում ընդունելի ծրագիր կազմել, որը հնարավորություն կտա առաջիկայում շարունակել հարաբերությունները»,- նշեց Ս. Մկրտչյանը:
Դեսպանի խոսքով՝ եվրոպական կողմին ՀՀ վարչապետ Ն. Փաշինյանը ներկայացրել է Հայաստանի կողմից գերակա գնահատվող 13 ոլորտներ, եվրոպական կողմը դրական է ընկալել այդ ոլորտները, որպես համագործակցության հիմք: «Այժմ մենք էլ, որպես դիվանագիտական ներկայացուցիչներ, աշխատանք են տանում ԵՄ երկրների հետ, որպեսզի առաջարկված այդ ոլորտային համագործակցության շրջանակներում ներգրավենք այդ երկրներին՝ հաշվի առնելով նաև նրանց հետաքրքրությունները»:
Դեսպանը նկատեց, որ Հայաստանի իշխանությունը թավշյա հեղափոխությունից հետո ունի արմատական բարեփոխումներ իրականացնելու քաղաքական կամք:
Մանրամասն՝ տեսանյութում:
