Երեկ Երևանի Ավան և Նոր Նորք վարչական շրջանների ընդհանուր իրավասության դատարանը՝ Դավիթ Գրիգորյանի նախագահությամբ, որոշեց փոխել Ռոբերտ Քոչարյանի խափանման միջոց կալանքը՝ անձնական երաշխավորությամբ: Հարցով անձնական երաշխավորություն էին ներկայացրել Արցախի գործող և նախկին նախագահներ Բակո Սահակյանը և Արկադի Ղուկասյանը։
Միջազգային և անվտանգության հարցերի հայկական ինստիտուտի հիմնադիր Ստյոպա Սաֆարյանը «Առաջին լրատվական»-ի հետ զրույցում նշեց, որ եթե անգամ Բակո Սահակյանը և Արկադի Ղուկասյանը երաշխավորել են, որ Ռոբերտ Քոչարյանը դուրս գալով չի խուսափի քննությունից, ակնհայտորեն նրանք չեն երաշխավորել, որ նա չի ազդելու վկաների վրա։ Նրա խոսքով՝ իրավիճակին անհամաչափ որոշում է կայացվել, տեղի ունեցածն անթույլատրելի էր և մեծ վտանգներ է պարունակում գործի հետագա քննության համար և ինչպես իրենց հասու խողովակներով կարողացել են հասնել դատարանի այս որոշմանը՝ խափանման միջոցի փոփոխման հարցով, նույն մեթոդներով էլ աշխատելու են վկաների վրա․
«Քրեական գործի բոլորը հատորները գիտեն անուն առ անուն, գիտեն բոլոր վկաներին և այս ընթացքում ինչ աշխատանք են տանելու այս վկաների հետ, մենք չգիտենք և շատ դեպքերում կարող է չիմանանք էլ։ Եթե նա, ինչպես ինքն է հայտարարել, որ փախչող տղա չէ, ակնհայտորեն նա մի ճանապարհ ունի ազդել այդ բոլոր վկաների վրա՝ փոխել տալ ցուցմունքները։ Ինձ համար սա անհասկանալի որոշում է»,-հավելեց Ստյոպա Սաֆարյանը։
Նրա դիտարկմամբ՝ դատական համակարգը պետք է նախապատրաստվեր այս մեկ տարվա ընթացքում։
«Անցյալ տարվա ամռանից հիշեցնում էի, որ դատական համակարգը լրջագույն պրոբլեմ է և նախկին իշխանությունների կողմից նշանակված դատավորներն իրավունք չունեն պաշտոնավարելու, շատ հանգիստ կարելի էր շատ դատավորներից ազատվել, որոնց պատճառով Հայաստանի վրա ՄԻԵԴ-ի վճիռներ են եկել։ Միայն դա բավարար կլիներ այդ մարդկանց գործից հանելու համար։ Եվ այս կտրվածքով թողնել դատական համակարգը և բերել գտնված գործն ապացույցներով նրանց ձեռքը տալ, սա նշանակում է գառանը հանձնել գայլին»,-հավելեց նա։
