Օպերայի բակի վերջին կանաչապատ հատվածում իրականացվող շինարարության մասին բարձրաձայնվեց օրերս, սակայն քաղաքապետարանը այդպես էլ որևէ ողջամիտ պատասխան չտվեց, թե ինչ է կառուցվում այդ կանաչապատ տարածքում, և, որ ամենակարևրն է, ով է կառուցողը:
Թեև մի քանի օր առաջ միայն տաղավարներ էին տեղադրված, այս օրերին արդեն ակտիվ շինարարական աշխատանքներ են տարվում, սալիկապատվում է կանաչապատ տարածքն ու տեղադրված տաղավարների վրա կառուցվում են երկաթյա կոնստրուկցիաներ, ինչը հուշում է, որ մի քանի օրից ականատես կլինեն ավարտված-պատրաստ հերթական սրճարանին:
«Առաջին լրատվական»-ը այսօր քաղաքապետարանից կրկին հետաքրքրվեց, թե կարո՞ղ են վերջապես տեղեկացնել հասարակությանը, թե ի՞նչ է կառուցվում Երևանի հենց կենտրոնում, և ով է կառուցողը: «Այնտեղ կար գործող սրճարան, և ներկայումս արդիականացման աշխատանքներ են տարվում»,- պատասխանեցին քաղաքապետարանի տեղեկատվության և հասարակայնության հետ կապերի բաժնից: Իսկ թե ով է այդ արդիականացման աշխատանքների «հովանավորը»՝ մեզ այդպես էլ չպատասխանեցին:
Նշենք, որ նոր կառուցվող սրճարանի անմիջապես հարևանությամբ գտնվում է ԱԺ ՀՀԿ-ական պատգամավոր Սամվել Ալեքսանյանին պատկանող «Ռիչ» սրճարանը, որտեղ ամռանը շատ հաճախ կարելի է տեսնել ԱԺ գործարար պատգամավորին: Ըստ հավաստի տեղեկությունների՝ հենց նա է ընդլայնում իրեն պատկանող սրճարանի տարածքը:
Նոր կառուցվող սրճարանը «Ռիչի» հետ միասին պատկանելու է Սամվել Ալեքսանյանին: Դե, իսկ քաղաքապետարանը մեծ հոժարությամբ ընդառաջել է նրան և հատկացրել Օպերայի «անսրճարան» մնացած միակ փոքրիկ կանաչապատ տարածքը: Եթե Փակ շուկան զիջեցին Ալեքսանյանին, Օպերայի կանաչապատ տարածքն ի՞նչ է, որ չզիջեին, ոչինչ, որ «սիրուն չի»:
«Մենք ենք մեր քաղաքի տերը» քաղաքացիական նախաձեռնությունն արդեն իսկ արձագանքել է կատարվող շինարարությանը: «Երևանի խամաճիկ քաղաքապետարանը թքած ունի Օպերայի այլանդակման վրա»,- Իրենց ֆեյսբուքյան էջում գրել են նրանք: Իսկ երգիչ Արթուր Իսպիրյանն իր հերթին գրել է․ «Սիրելի՛ երևանցիներ, նորից լկտիաբար, ստորաբար, թշնամաբար, այլանդակում են մեր քաղաքը՝ ամենուրեք անճաշակություն, անօրինականություն։ Դրանցից մեկը Օպերայի տարածքում կառուցվող շինությունը՝ խայտառակ տգեղ։ Տո՛, ա՛յ համբալներ, էս ի՞նչ եք անում, ա՛յ փնթիներ, ա՛յ անկուշտներ, ա՛յ ավագանի, ինչո՞վ եք զբաղված սուտ մտավորականներով ձեր»:
