Վրաստանի նախկին նախագահ Էդուարդ Շևարդնաձեն վրացական «Ասավալ-Դասավալի» շաբաթաթերթին տված հարցազրույցում հայտարարել է, թե Ռուսաստանը շատ շուտով կդառնա ՆԱՏՕ-ի անդամ. այդ հարցը գործնականում լուծված է: Նրա խոսքով, այդ առումով Վրաստանի տարածքային ամբողջականության վերականգնումը «շատ դժվար հասանելի հեռանկար է»:
«Վրաստանի իշխանությունները բանակցությունների չեն գնում Ռուսաստանի հետ, թեև դա անհրաժեշտ է, առանց Ռուսաստանի հետ երկխոսության տարածքային ամբողջականության հարցը չի լուծվի: Մենք վաղուց ենք այդ մասին խոսում: Բայց ով է վարելու բանակցությունները»,-ասել է Շևարդնաձեն: Նախկին նախագահն ընդգծել է, որ ՆԱՏՕ-ի խորհրդարանական վեհաժողովի կողմից ի պաշտպանություն Վրաստանի ընդունվող բանաձևերը «ոչ մի խնդիր չեն լուծում»: «Դրանք ընդհանուր խոսքեր են, տակավին իմ նախագահության օրոք ՄԱԿ-ը ութ բանաձև է ընդունել Վրաստանի օգտին, բայց դրանք ոչ ոք չի կատարում»,-ասել է նա:
Է.Շևարդնաձեն Թբիլիսիի համար կարևոր է համարել Վրաստանի և ԱՄՆ-ի նախագահների հանդիպումը: «Դա ԱՄՆ-ի կողմից Վրաստանի տարածքային ամբողջականության պաշտպանություն է, և այն կարևոր է»,-հայտարարել Է Վրաստանի նախկին նախագահը: