«Կարևոր չէ՝ ինչպես են կոչում. հեղափոխություն, ապամոնտաժում… կարևոր է, որ մեր երկրում տեղի է ունեցել իրադարձություն, և նոր բարեկեցության կանոններ ու օրենքներ են բերվել, որոնցով պետք է մեր ժողովուրդն առաջնորդվի. նոր ճանապարհ է սկսվել, ոչ մի բան դեռ ավարտուն չէ, և այդ ճանապարհը շատ բարդ է լինելու, բայց հետաքրքիր… Այն ինչ կատարվում է մեր փոքրիկ «երկրագնդում», երևի թե շուտվանից էր հասունացել: Սիմուլյատիվ ինֆորմացիաների մեթոդներ կիրառող ղեկավարների ոճը նահանջում է: Ժողովուրդը հոգնել էր սիմուլյատիվ ղեկավարման մեթոդներից»,- այս մասին «Առաջին լրատվական»- ի հետ զրույցում ասաց ռեժիսոր, դերասան Միքայել Դովլաթյանը՝ պարզաբանելով, որ սիմուլյատիվ մեթոդներն իրական չէին, այլ կեղծ: Նրա դիտարկմամբ՝ աշխարհում միտում կա՝ իշխանության են գալիս ոչ համակարգային ղեկավարներ՝ նոր գաղափարներով:
Մեր զրուցակցի գնահատմամբ՝ Նիկոլ Փաշինյանն անհատ է, ուժեղ անձնավորություն: «Իսկ թե ինչ է լինելու հետո, ժամանակը ցույց կտա: Այս հնարավորությունը չպետք է կորցնել, սա մեծ շանս է նոր սերունդների համար լավ ապագա, նոր բարեկեցության օրենքներով ապրելու միջավայր ստեղծելու համար»:
Դովլաթյանի դիտարկմամբ՝ Հայաստանը մշակութային գանձ է. «Ինչպե՞ս կօգտագործի այս գանձը և դեպի ո՞ւր կգնա մեր կառավարությունը: Կառավարությունն ունի տնտեսական ծրագիր, որտե՞ղ է ծրագրի մեջ մշակութային բաղադրիչը. այս հարցերը շատ կարևոր են»:
Մանրամասն՝ տեսանյութում:
