«Պետք է վերադառնանք Լևոն Տեր-Պետրոսյանի հնչեցրած գնահատականներից մեկին՝ նույն Ծառուկյանի հասցեին: Նա հանրահավաքներից մեկում ասաց, որ Գագիկ Ծառուկյանը բոմժ է դառնալու: Ի՞նչ եղավ, ի՞նչը ստիպեց այսպես կտրուկ փոխվել»,- «Առաջին լրատվական»-ի հետ զրույցում անդրադառնալով մարտի մեկի հանրահավաքում առաջին նախագահ Լևոն Տեր-Պետրոսյանի հայտարարություններին՝ նման տեսակետ հայտնեց «Հայրենիք և պատիվ» կուսակցության, «Հակակոռուպցիոն» ՀԿ նախագահ Գառնիկ Մարգարյանը:
«Նուրբ քաղաքականությո՞ւն. այստեղ նուրբ քաղաքականություն չէ»,- շարունակեց նա:
Նրա խոսքով՝ երկրում ամեն ինչ մոնոպոլիզացվել է, և այդ մոնոպոլիստներն ընդամենը երկու տասնյակ մարդիկ են՝ Ռոբերտ Քոչարյան, Սերժ Սարգսյան, իրենց բուրգը, առանձին մարզպետներ, նախարարներ:
«Որպես երևանաբնակ ՀՀ քաղաքացի՝ ես դեմ եմ խաղատներին, բայց երբ երկրում չկա աշխատատեղ, ֆաբրիկա, արդյունաբերություն և գյուղատնտեսություն՝ այն բազմաթիվ փոքր խաղատները, որ գործում էին և դասվում մանր կամ միջին ձեռնարկությունների շարքին, փակվում են, և հսկայական խաղատներ են կառուցվում, ու պլանավորում են նորը կառուցել 150 միլիոնով, նշանակում է մոնոպոլիզացիա է գնում, որի հետևանքով տասնյակ, նույնիսկ հարյուրավոր մարդիկ՝ այդ փոքր խաղատներում աշխատողները, փողոց են շպրտվում: Սա նշանակում է, որ Գագիկ Ծառուկյանը գործող իշխանությունից ոչնչով չի տարբերվում և նրանց կազմում է:
Ինչո՞ւ է Լևոն Տեր-Պետրոսյանը պրոպագանդում, երբ նախկինում տվել է այդպիսի գնահատական: Ես չգիտեմ, թե դրա պատճառը որն է, բայց հայ մարդը դեռ այդքան չի կորցրել հիշողությունը և չի գնա այնպիսի բանի, որ բիրտ օլիգարխներին բերի իշխանության և համեմատի Իվանիշվիլիի հետ:
Որտեղի՞ց այդ գումարները, եթե ոչ՝ ժողովրդի գրպանից: Գագիկ Ծառուկյանը իշխանության մի մաս է: Ի՞նչ է, ուզում են Գագիկ Ծառուկյան և Ռոբերտ Քոչարյա՞ն»,- հարցադրում հնչեցրեց Մարգարյանը:
Մեր այն հարցին՝ ինչո՞ւ, իր գնահատմամբ, մարտի մեկի պատասխանատուների շարքում հանրահավաքի ընթացքում չհնչեց Ռոբերտ Քոչարյանի անունը, մեր զրուցակիցը պատասխանեց. «Թաքնված, քողարկված գնում է Ռոբերտ Քոչարյանի վերակենդանացման հարցը: Մարտի մեկին նա էր երկրի նախագահը, նա էր կրակելու հրաման տվել, չմոռանանք «Պապլովոկը» և այլն»,- ասաց նա:
Մանրամասները՝ տեսանյութում:
