Էրեբունի և Նուբարաշեն վարչական շրջանների ընդհանուր իրավասության դատարանում Արտուշ Գաբրիելյանի նախագահությամբ ավարտվեց Նելլի Հարությունյանի գործի դատավարությունը:
Ըստ դատական ակտի՝ 36-ամյա Նելլին 2013 թվականի օգոստոսի 17-ին, ժամը 22-ի սահմաններում Երևանի թիվ 147 մանկապարտեզի բակում Նորայր Մ.-ի հետ գրկախառնվելու ընթացքում վերջինիս վերնաշապիկի ու տաբատի գրպաններից հափշտակել է 30 հազար դրամ:
2013 թվականի հոկտեմբերի 26-ին, գիշերվա ժամը 2-ն անց 30-ի սահմաններում Երևանի Խորենացու փողոցում գործող «Գետառ» հյուրանոցային համալիրի սենյակներից մեկում 10 հազար դրամի դիմաց Սուրիկ Հ.-ի հետ սեռական հարաբերություն ունենալուց հետո Նելլին, որ ներկայացել էր Քրիստինե անունով, օգտվելով Սուրիկի՝ քնած լինելու հանգամանքից, նրա տաբատի գրպանից վերցրել է ընդհանուրը՝ 754 հազար 20 դրամ՝ 59 հազար ՌԴ ռուբլի և 100 հազար ՀՀ դրամ և սենյակից դիմել է փախուստի: Քնած Սուրիկը դռան ձայնից արթնացել, սենյակից դուրս է եկել ու բռնել Նելլիին:
Նելլի Հարությունյանին մեղադրանք է առաջադրվել գողության ու գողության փորձի համար՝ ՀՀ քրեական օրենսգրքի 177 հոդվածի 1-ին մասով և 34-177 հոդվածի 2-րդ մասի 2-րդ կետով:
Դատարանում Նելլին իրեն մեղավոր է ճանաչել, ասել, թե ֆինանսական խնդիրների պատճառով ստիպված է եղել զբաղվել մարմնավաճառությամբ:
Տուժող Սուրիկը նախաքննության փուլում մեկնել է Ռուսաստան՝ դիմում թողնելով, որ գործը քննեն իր բացակայությամբ և հաշվի առնեն, որ ինքը նյութական կորուստ չի կրել:
Առաջին տուժողը՝ 56-ամյա Նորայրը դատարանում հայտնել է, թե 2013 թվականի օգոստոսի 17-ին Գարեգին Նժդեհի փողոցում գրկաբաց իրեն ընդառաջ է ելել մի ժպտադեմ ու ջահել կին, հին ծանոթի պես առաջարկել է մի հանգիստ տեղ զրուցել:
Նա առաջարկել է իր մարմնավաճառական ծառայությունները, և համաձայնության են եկել 5 հազար դրամանոց ծառայության շուրջ:
Անցել են մոտակա կամարամուտքն ու հայտնվել մանկապարտեզի շենքի մոտ:
Նստել են նստարանին: Նելլին քանդել է Նորայրի վերնաշապիկի կոճակները, հանել է վերնաշապիկը, և տղամարդը գոտկատեղից վերև մնացել է մերկ:
Նելլին սկսել է շոյել, համբուրել Նորայրին, մինչև անգամ բարձրացրել է իր սվիտերը…
Հետո գրկել է Նորայրին ու ձեռքերով շոյել նրա նստատեղը: Ապա ասել է, թե պետք է զուգարան գնա: Շտապ մտել է թփերի արանքն ու անհետացել:
Նորայրը սպասել է, բայց Նելլին այդպես էլ չի վերադարձել:
Երկու ժամ սպասելուց հետո Նորայրը շոշափել է տաբատի հետևի գրպանները ու համոզվել, որ Նելլի հետ անհետացել է նաև գրպանում եղած քսան հազար դրամը: Ընդհանուր առմամբ՝ Նելլին Նորայրից հափշտակել է 30 հազար դրամ…
Օրեր անց, երբ Նելլին բռնվել է «Գետառ» հյուրանոցում, հայտնվել ոստիկանությունում, այնտեղ է հրավիրվել նաև Նորայրը և վերջապես ճանաչել իրեն հինգ հազար դրամանոց ծառայությունը չմատուցած, իր երեսուն հազար դրամը հափշտակած «հին ծանոթ» Նելլիին:
Նելլի Հարությունյանը նախկինում երեք անգամ դատապարտված է եղել:
Վերջին երկու անգամը՝ 2004 և 2006 թվականներին, դատապարտվել է խուլիգանության և դիտավորությամբ ծանր մարմնական վնասվածք պատճառելու համար: Վերջին պատժից ազատվել է 2009 թվականի փետրվարի 26-ին՝ պայմանական-վաղաժամկետ:
Այս անգամ ընդհանուր իրավասության դատարանը հաշվի առավ հանցագործությունների կատարման վտանգավոր ռեցիդիվը:
Նելլի Հարությունյանը մեղավոր ճանաչվեց մեղսագրված արարքների համար և վերջին հաշվով դատապարտվեց 3 տարի 6 ամիս ազատազրկման:
Պատժի սկիզբը՝ 2013 թվականի հոկտեմբերի 26-ից:
