«Իրաքի և Լևանտի իսլամական պետություն» ծայրահեղական խմբավորումը սկսել է նահանջել Սիրիայի հյուսիսից դեպի արևելք: Այս մասին հաղորդում է Agence France-Presse-ը՝ վկայակոչելով Syrian Observatory for Human Rights իրավապաշտպան կազմակերպությանը:
Շարժումը դուրս է բերել իր գրոհայիններին Հալեպի մարզի Ազազ քաղաքից, Դեյր-Ջամալ, Քաֆին գյուղերից և մի շարք բնակավայրերից:
Քանի որ Սիրիայի հյուսիսում խմբավորումն ունի ամենաթույլ դիրքերը, իրավապաշտպան կազմակերպությունում կարծում են, որ իսլամիստները պատրաստվում են մեկ այլ ապստամբ խմբավորման՝ «Ջեբհաթ Ալ-Նուսրա»-ի հարձակմանը:
«Իսլամական պետության» գրոհայինները ուժեր են հավաքում երկրի արևելքում:
Փետրվարի 25-ին «Ջեբհաթ Ալ-նուսրան», որը պաշտոնապես համարվում է «Ալ-Քաիդայի» ներկայացուցիչը Սիրիայում, վերջնագիր է ներկայացրել «Իսլամական պետությանը»՝ պահանջելով, որ շարժման ներկայացուցիչները կանգնեն իսլամական դատարանի առաջ:
