ՀՀ տրանսպորտի, կապի և տեղեկատվական տեխնոլոգիաների նախարար Հակոբ Արշակյանը ներկայացրել է ընթացիկ տարում նախատեսված ճանապարհաշինական ծրագրերը: Նա նշեց, որ աննախադեպ քանակով ճանապարհաշինական աշխատանքներ են իրականացվելու՝ ավելի քան 300 կմ:
«Խնդիր է դրված Երևանից դեպի Վրաստան, դեպի Իրան ունենալ բարձր որակի ճանապարհ: Շեշտը դնելու ենք Հայաստանը տարանցիկ գոտի դարձնելու վրա»,- ասաց նախարարը:
Հյուսիս-Հարավ ավտոճանապարհի ծրագրով «Տրանշ-3»-ում ներկայում շինարարական աշխատանքներն ընթացքի մեջ են: Նախարարը Հյուսիս-Հարավ ավտոճանապարհի շինարարության ավարտի հստակ ժամկետներ չնշեց:
Ընթացիկ տարում զգալի աշխատանքներ են նախատեսված Թալին-Լանջիկ, Լանջիկ-Գյումրի ճանապարհահատվածի ուղղությամբ, սակայն նախկինում եղած որոշ խնդիրների պատճառով չեն կարողանալու այդ նախագիծը ժամանակին ավարտել: Ներկայում շինարարություն իրականացնող ընկերության հետ քննարկումների մեջ են՝ կապված վերջնաժամկետի հետ։
«Ունենք մեծ նախագիծ՝ Սիսիան-Քաջարան հատվածում։ Թունելի և երեք կամրջի շինարարությամբ մենք 2 ժամով կրճատում ենք երթևեկության տևողությունը։ Սա կարևոր նախագիծ է»,- ասաց Հակոբ Արշակյանը։
Խոսելով ճանապարհաշինական աշխատանքների որակի մասին՝ Հակոբ Արշակյանը նշեց, որ ճանապարհաշինական ծրագրեր իրականացնող բոլոր ընկերությունների հետ հանդիպումներ են ունեցել:
«Մի բան հստակ է՝ թույլ չենք տալու, որ հարկատուների հաշվին արվող շինարարությունն անորակ լինի, այլապես չեն վճարվի, անհրաժեշտության դեպքում էլ կենթարկվեն նաև պատասխնատվության՝ անկախ նրանից, թե ում են պատկանում»,-ասաց նա:
