Եվրախորհրդարանի փոխնախագահ Յացեկ Պրոտասևիչը փետրվարի 26-ի երեկոյան անսթափ վիճակում բերման է ենթարկվել Մայնի Ֆրանկֆուրտի օդանավակայանում: Այս մասին հայտնում է Frankfurter Rundschau-ն:
Տեղի ոստիկանության տվյալներով՝ քաղաքական գործիչն այնքան հարբած է եղել, որ դժվարությամբ է ոտքի վրա մնացել: Նա վիրավորել է օդանավակայանի աշխատակիցներին, մաքսային ծառայողներին և ոստիկաններին՝ նրանց անվանելով «նացիստներ» և բացականչելով՝ «Հայլ Հիտլեր»: Բացի այդ, նա բղավել է, որ օդանավակայանի աշխատակիցները պետք է աշխատեին «Օսվենցիմում»:
Քաղաքական գործիչը հայտարարել է, որ գերմանացիները չափազանցնում են իր հարբածության աստիճանը, նրանք բղավել են իր վրա՝ այնպիսի արտահայտություններ օգտագործելով, որոնք օգտագործվել են համակենտրոնացման ճամբարների գերմանացի պահակների կողմից (Raus!-Հեռացի´ր): Նա բողոքել է նաև, որ իր ուղեբեռը խուզարկել են՝ չնայած դիվանագիտական անձեռնմխելիությանը:
Պրոտասևիչը հայտարարել է, որ արդեն պատմել է միջադեպի մասին Եվրախորհրդարանի խոսնակ Մարտին Շուլցին: Բացի այդ, նա չի առարկել տեսահսկման խցիկների տեսագրությունների հրապարակմանը: Նա այնուամենայնիվ խոստովանել է, որ իրեն չափազանց էմոցիոնալ է պահել:
Պրոտասևիչը Եվրախորհրդարանում ընտրվել է լեհական իշխող «Քաղաքացիական հարթակ» կուսակցությունից:
