Մամեդյարով-Մնացականյան հանդիպում՝ Լավրովի ներկայությամբ. առանձին խա՞ղ, թե՞ հերթական հանդիպում

Հայաստանի և Ադրբեջանի ԱԳ նախարարները հանդիպելու են ապրիլի 15-ին Մոսկվայում: Հայաստանի ԱԳՆ մամուլի խոսնակ Աննա Նաղդալյանը նախատեսվող հանդիպման հետ կապված պարզաբանել է, որ հանդիպմանը ներկա կգտնվի նաև ՌԴ ԱԳ նախարար Սերգեյ Լավրովը՝ որպես ԵԱՀԿ Մինսկի խմբի համանախագահող երկրի ԱԳ նախարար։

Ռուսաստանի Դաշնության ԱԳՆ պաշտոնական ներկայացուցիչ Մարիա Զախարովան իր հերթին նշել է, որ հանդիպումը նվիրված կլինի ԼՂ հիմնախնդրի կարգավորման շուրջ քննարկումներին, որոնց ներկա կլինեն նաև ԵԱՀԿ Մինսկի խմբի համանախագահները: ԱԳՆ ներկայացուցիչը պատասխանել է նաև լրագրողի հարցին Վիեննայում կայացած Փաշինյան-Ալիև բանակցություններից հետո համատեղ մարդասիրական նախագծերի իրականացման անհրաժեշտության հայտարարության մասին՝ անդրադառնալով Ղարաբաղի օդային տարածքը միջազգային ավիաչվերթների համար բացելու և Սարսանգի ջրամբարի ռեսուրսները երկկողմ օգտագործելու մասին Արցախի նախկին վարչապետ Արայիկ Հարությունյանի առաջարկներին և դրանց դերակատարությանը ԼՂ հիմնախնդրի խաղաղ կարգավորման հարցում: «Կարծում եմ, որ առաջին հերթին այդ նախաձեռնությունը, ինչպես նաև մյուսները պետք է նախ գնահատեն հակամարտության կողմերը, այնուհետև եթե անհրաժեշտ լինի այլ երկրների կամ համանախագահների մասնակցությունը, այդ հարցը նույնպես կարող է քննարկվել նաև առաջիկայում Մոսկվայում կայանալիք հանդիպմանը», – հավելել է Զախարովան:

Քաղաքագետ Ռոբերտ Ղևոնդյանի կարծիքով՝ հանդիպումը կլինի Փաշինյանի և Ալիևի հանդիպման արդյունքների ամփոփում: «Կլինեն որոշ հարցեր, որոնք միտված կլինեն բանակցությունների գործընթացն առավել առաջ մղելուն, բայց ինչ-որ առանձին նախաձեռնություն, որը դուրս կմնա Մինսկի խմբի բանակցային գործընթացի տրամաբանությունից, չեմ կարծում, թե լինի»,-«Առաջին լրատվական»-ի հետ զրույցում ասաց նա։

Մեր զրուցակիցն ընդգծեց. «Ադրբեջանի արտգործնախարարը մեկնել էր Ռուսաստան, այնտեղ հանդիպում է ունեցել, և հիմա առիթն օգտագործելով՝ հրավիրել են նաև մեր արտգործնախարարին։ Հանդիպման մասին խոսակցություններ կային դեռ 3-4 օր առաջ, բայց միայն ապրիլի 11-ին Երևանը դա պաշտոնապես հաստատեց։ Կարծում եմ՝ Ռուսաստանի ընդհանուր մոտեցումը չի փոխվել, ռուսական կողմը, որպես համանախագահներից մեկը, շարունակում է հետևել բանակցային գործընթացին և ինչ-որ տարբերակներ գտնել։ Ես չեմ կարծում, թե առանցքային շեղում է տեղի ունեցել»։

Շարունակելով իր միտքը՝ քաղաքագետն ընդգծեց. «Ինչպես գիտեք՝ Վիեննայում Նիկոլ Փաշինյանը Արցախի մասնակցության հարցն էր բարձրացրել, դրա վերաբերյալ եղան խոսակցություններ։ Կարծում եմ՝ նաև այդ ուղղությամբ արտգործնախարարների մակարդակով բանակցությունները պետք է շարունակվեն։ Ըստ իս՝ կքննարկեն նաև, թե ինչպես են Հայաստանի և Ադրբեջանի հասարակություններն ընդունել մի շարք հարցերի շուրջ Վիեննայում եղած խոսակցությունների արդյունքները։ Ես սա հերթական հանդիպումն եմ համարում, և իմ կարծիքով՝ օրակարգից դուրս հարցեր չեն քննարկվի»։

Ինչ վերաբերում է Արցախի նախկին վարչապետ Արայիկ Հարությունյանի առաջարկին՝ Սարսանգի ջրամբարը Ադրբեջանի և Արցախի կողմից համատեղ օգտագործելու վերաբերյալ, այդ առաջարկությանը Զախարովայի արձագանքին, մեր զրուցակիցն ասաց. «Ոչ միայն Արայիկ Հարությունյանի առաջարկությունը, այլ Նիկոլ Փաշինյանը ևս Վիեննայից հետո նշեց, որ որոշակի քայլեր պետք է իրականացնել հասարակություններին խաղաղության նախապատրաստելու հետ կապված։ Եվ հիմա Արայիկ Հարությունյանի շուրթերով մենք հենց դա ենք փորձում իրականացնել, բայց ես չեմ կարծում, թե դա խիստ իրատեսական է, որովհետև մոտավորապես 30 տարի է՝ Ադրբեջանը մերժում է ցանկացած ծրագիր, քանի դեռ չի լուծվել գլխավոր հարցը»։

Քաղաքագետ Լևոն Շիրինյանը, մինչդեռ, մեզ հետ զրույցում ասաց, որ Մոսկվան միշտ էլ ցանկացել է Ղարաբաղյան հարցում իր սեփական խաղը խաղալ։ Բայց այժմ դժվար է ասել, թե դա նրան որքանով կհաջողվի, որովհետև ոչ ոք չգիտի, թե իրադարձությունները Ռուսաստանում ինչպես կզարգանան նույնիսկ մի քանի ամիս հետո. «Ռուսներն իհարկե խաղում են՝ այստեղի հինգերորդ շարասյան օգնությամբ, բայց դա նրանց չի հաջողվելու։ Մոսկվան պարզապես ադրբեջանցիներին դրել է իր փայտիկի ծայրին ու ասում է՝ հարձակվիր Հայաստանի վրա. նրանց ուզածը դա է՝ միշտ լարված պահել ու ստիպել, որ իրենց զենքը գնենք»։

Ըստ քաղաքագետի՝ Հայաստանն ու հայ ժողովուրդը պետք է հույսը միայն իր վրա դնի, որովհետև ցանկացած պարագայում՝ այդ թվում Արցախյան հարցում, Մոսկվան գործում է իր շահերին համապատասխան: «Այս դեպքում էլ իր խլամ զենքն է վաճառում Ադրբեջանին։ Ես ամեն դեպքում ողջունում եմ մեր նոր իշխանությունների դիրքորոշումն ու հաստատակամությունը։ Փաշինյանն իր դիրքերից չպետք է նահանջի, մեր բռնած գիծն ամբողջովին տեղավորվում է մեր ազգային շահերի տրամաբանության մեջ»,- եզրափակեց նա։