«Մենք բոլորս գիտենք Ադրբեջանի նկրտումները, նրանք մինչև հիմա էլ երազում են ուժով հետ վերցնել մեր ազատագրած հողերը։ Բացի այդ՝ իրենք ախորժակ ունեն ամբողջ Արցախը վերցնել, Սյունիքը, նաև աչք ունեն նաև Երևանի վրա»-«Առաջին լրատվական»-ի հետ զրույցում խոսելով ապրիլյան քառօրյա պատերազմի պատճառների մասին ասաց Հայ Առաքելական եկեղեցու Արցախի թեմի առաջնորդ Պարգև արքեպիսկոպոս Մարտիրոսյանը։
Պարգև Սրբազանը նշեց՝ Ադրբեջանը պատերազմը սկսեց մեր հարավային սահմանները վերցնելու համար.«Մենք գիտենք, որ ԱՄՆ-ը, Իսրայելը Պարսկաստանին դեմ էին և նրանք շատ էին ուզում մեր հարավային շրջանները վերցնել, որպեսզի հսկողության տակ առնեն Պարսկաստանը, այդ պատճառով էլ Իսրայելը այդքան զենք է մատակարարում Ադրբեջանին»։
Մեր զրուցակիցը նշեց, երբ մեր առջև ծառացավ նման վտանգ՝ առանց որևէ կոչ անելու, ամբողջ հայ ժողովուրդը բռունցքվեց, ինչն, ըստ Սրբազանի, ֆենոմենալ երևույթ է.«Մենք միշտ մտածում էինք՝ 18 տարեկան կոմպյուտեր խաղացող երեխաները ինչպե՞ս կպահեն մեր սահմանը, նրանք մեզ զարմացրեցին, հիացրեցին, ոչ ոք չլքեց դիրքը, արյունաքամ լինելով, կոմայի մեջ ընկած, ձեռքն ու ոտքը կոտրած շարունակեցին պայքարը։ Սա երկրորդ ֆենոմենալ երևույթն է։ Մենք նոր անկախության, սքանչելի սերունդ ունենք, կեցցե՛ն իրենց ծնողները»։
Պարգև Սրբազանի խոսքերով՝ Ադրբեջանի իշխանությունները հակահայական սարսափելի ատելություն են սերմանվել հասարակության մեջ.«Իսկ մենք Ադրբեջանի ժողովրդի նկատմամբ ատելություն չունենք, մեզ խաղաղության նախապատրաստել պետք չէ, մենք առանց այդ էլ խաղաղասեր ենք»։
Հարցազրույցն ամբողջությամբ՝ տեսանյութում