Երևանում մարտի 11-ից կտրվի Ֆրանկոֆոնիայի մշակութային օրերի մեկնարկը: Միջոցառումները կտևեն մինչև ապրիլի 12-ը:
Հայաստանում Ֆրանսիայի դեսպան Ժոնաթան Լաքոտը լրագրողների հետ հանդիպմանն ասաց, որ Ֆրանսիայի դեսպանությունը Ֆրանկոֆոնիայի օրերին կառաջարկի լեզվամշակութային տարատեսակ միջոցառումներ՝ նվիրված կինոյին, թատրոնին, գիտությանը, գաստրոնոմիային: «Ֆրանսերենը լեզու է, որով ողջ աշխարհում խոսում է 300 միլիոն մարդ, որը գործարարության 3-րդ, ինտերնետի 4-րդ և մոլորակի վրա խոսվող 5-րդ լեզուն է, լեզու, որը տարածված է բոլոր 5 մայրցամաքներում»,-ասաց դեսպանը։
Հայաստանում Ֆրանսիայի դեսպանը կարևորեց նաև մարտի 21-ին և 22-ին Գյումրիում, Երևանում և Դիլիջանում կայանալիք ֆրանսիական գաստրոնոմիային նվիրված միջոցառումները: «Երևանի Ալյանս Ֆրանսեզ»-ում մարտի 23-ին կկայանա ֆրանսերեն լեզվի գրավոր մրցույթ՝ «Ասա տասը բառ» խորագրով: Միջոցառմանը կմասնակցեն 13-25 տարեկան պատանիներ ու երիտասարդներ: Լավագույնները կստանան մրցանակներ, այդ թվում՝ լեզվի ստաժ Ֆրանսիայում»,- նշեց պրն Լաքոտը:
Մարտի 28-30-ը Գորիսը կհյուրընկալի Հայաստանում երիտասարդ ֆրանկոֆոնների թատերական 3-րդ փառատոնը: «Ֆրանկոֆոնիայի օրերը կեզրափակվեն «Տվյալների գիտություն, հասարակությունների գիտություն» թեմայով համաժողովով, որը կկայանա ապրիլի 10,11,12-ին Հայաստանում Ֆրանսիական համալսարանի, Թուլուզի համակարգչային հետազոտությունների ինստիտուտի և ՀՀ ԳԱԱ միջև համագործակցությամբ»,- ընդգծեց դեսպանը:
