Բաղդադի դիրքորոշումը Քրդական ինքնավարության նավթային գործարքի վերաբերյալ վճռորոշ է՝ Թուրքիան իրաքյան նավթ չի վաճառի առանց կենտրոնական կառավարության համաձայնության՝ հայտարարել է Թուրքիայի էներգետիկայի և բնական պաշարների նախարար Թաներ Յըլդըզը՝ փոխանցում է Hurriyet Daily News-ը:
Նրա խոսքով՝ տեղեկությունն այն մասին, որ Թուրքիան 90 մլն դոլարի գործարք է իրականացրել, չի համապատասխանում իրականությանը:
«Եթե որևէ գործարք կնքվի, ապա Բաղդադն այդ մասին կիրազեկվի առաջին հերթին և Իրաքին գումար կհատկացվի: Դա թուրքական նավթ չէ, այն պատկանում է Իրաքին»,- ասել է Յըլդըզը:
Նախարարի խոսքով՝ Թուրքիան հույս ունի, որ Էրբիլն ու Բաղդադը շուտով կկարողանան պայմանավորվածություն ձեռք բերել:
Հիշեցնենք, որ հունվարի 3-ին Յըլդըզը հայտնել էր, որ Իրաքի Քրդական ինքնավարությունը սկսել է նավթ մատակարարել Թուրքիա, սակայն նավթը չի մատակարարվի եվրոպական շուկա առանց Բաղդադի համաձայնության:
Նրա խոսքով՝ Թուրքիան հույս ունի, որ Եվրոպայում նավթ արտահանելու Բաղդադի համաձայնությունը կստացվի այս ամիս:
Նա հավելել է, որ ստացված նավթը կպահվի պահեստներում այնքան ժամանակ, քանի դեռ Բաղդադի հետ համաձայնություն ձեռք չի բերվել:
