ՀՀ էկոնոմիկայի նախարարության Շուկայի վերահսկողության պետական տեսչության պետ Լևոն Խալիկյանի համար անհասկանալի է «Վաղարշ և որդիներ» կոնցեռնի նախագահ Վաղարշ Աբրահամյանի բարձրացրած աղմուկը՝ կապված տեսչության կողմից ընկերության նկատմամբ օրերս կիրառված 65 միլիոն դրամ տուգանքի հետ:
Խալիկյանի խոսքերով՝ իրենք դեռևս տարեվերջին նախարարությունում հրավիրել են թանկարժեք մետաղների վաճառքով զբաղվող անհատների և զգուշացրել, որ ստուգումներ են լինելու: Զգուշացումից երկու ամիս անց իրականացվել են ծրագրային ստուգումներ, և ըստ տեսչության պետի` հայտնաբերվել են բազմաթիվ խախտումներ: «Ստուգումներն անակնկալ չեն եղել: Զգուշացումից երկու ամիս անց գնացինք և բազմաթիվ խախտումներ հայտաբերեցինք տարբեր տեղերում, այդ թվում՝ «Վաղարշ և որդիներ» ընկերությունում»,- ասաց Խալիկյանը:
Նշենք, որ Վաղարշ Աբրահամյանը երեկ «Առաջին լրատվական»-ի հետ զրույցում ասել էր, որ տեսչության կողմից իր ընկերության նկատմամբ կիրառված 65 միլիոն դրամ տուգանքն ապօրինություն է: Եվ որ իր ընկերությունում ոչ մի խախտում էլ չկա, իրենք 100 տոկոսով մաքուր են աշխատում, բայց տեսչությունը, խախտելով օրենքը, իրենց տուգանել է: Ըստ Վաղարշ Ղարիբյանի՝ օրենքն իրենց թույլ է տալիս արտերկրից ներկրած զարդերը կրկնակի չհարգորոշել և չհարգադրոշել, քանի որ դրանք արդեն իսկ հարգորոշված ու հարգադրոշված են:
Խալիկյանի խոսքերով, սակայն, Վաղարշ Աբրահամյանը սխալ է մեկնաբանում օրենքը: «Պարոն Աբրահամյանն ինձանից երկար է այս ոլորտում աշխատել: Իմ տարիքի չափ երևի ստաժ ունի ոսկու վաճառքի բիզնեսում: Օրենքը հատակ նշում է, որ օտար երկրներից Հայաստան ներմուծված ցանկացած թանկարժեք իր պետք է ունենա պատշաճ ձևով հաստատված հարգի և հարգադրոշման օրինակ, քանի որ տարբեր երկրներում տարբեր ձև է նշվում պռոբը»,-ասաց տեսչության պետը՝ հավելելով, որ Հայաստանում այդ հարգորոշումն ու հարգադրոշումը մեկ անուն զարդի համար արժե 100-300 դրամ ընդհամենը, իսկ դա չանելու համար սահմանվում է 50 հազար դրամի տուգանք: «Ավելի լավ չէ՞ ծախսել 100 դրամ, որպեսզի չտուգանվել 50 հազարով»:
Խալիկյանը հատուկ ընդգծեց, որ «Վաղարշ և որդիներ» ընկերության նկատմամբ որևէ «ընդգծված վերաբերմունք» չունեն: Նմանատիպ խախտումներ հայտաբերվել են 8-9 այլ ընկերություններում, որոնք ևս տուգանվել են:
Առավել մանրամասն՝ տեսանյութում
