«Ես մտավախություն ունեմ, որ Մարտի 1-ի գործի քննությունը միակողմանիորեն է ընթացել, որովհետև հրապարակայնորեն բարձրացվել են տարբեր հարցեր, այդ թվում՝ Սեյրան Օհանյանի կողմից, որոնց վերաբերյալ ես կասկածում եմ, որ կան պատասխաններ: Ի վերջո՝ ո՞վ է պատասխան տալու 10 զոհերի համար»,- «Առաջին լրատվական»-ի հետ զրույցում ասաց «Այլընտրանքային նախագծեր» խմբի անդամ, ԱԺ մարդու իրավունքների պաշտպանության հանձնաժողովի նախկին նախագահ Էլինար Վարդանյանը՝ ակնկալելով, որ Մարտի 1-ի դատավարությունը կլինի բռնբաց:
Մեր զրուցակցի կարծիքով՝ եթե հանկարծ գործը հասնի Եվրոպական դատարան, Հայաստանի դեմ կկայացվի հերթական ոչ ցանկալի որոշումը:
«Մենք պատրա՞ստ ենք նստել և բաց խոսել Մարտի 1-ի պատճառների մասին, պատրա՞ստ ենք քննարկել բոլոր այն խնդիրները, որոնք բերել են Մարտի 1-ին, և պատրա՞ստ ենք ստանալ մեզ հուզող հարցերի պատասխանները»,- հարցեր է առաջ քաշում Էլինար Վարդանյանը և հավելում, որ ինքը չի ուզում ներքին համոզմունք ձևավորել ենթադրությունների հիման վրա:
Իրավապաշտպանը կարծում է, որ Մարտի 1-ի գործը կարող է ի վերջո սպառվել այն պարագայում, երբ գործը կքննվի ընդհանրապես Մարտի 1-ի հետ որևէ առնչություն չունեցող իշխանությունների կողմից. «Մարտի 1-ից հետո բոլոր իշխանությունները ուղղակի կամ անուղղակի կերպով առնչություն են ունեցել Մարտի 1-ի հետ, և քանի դեռ իշխանության չի եկել Մարտի 1-ի հետ առնչություն չունեցող որևէ այլ ուժ, հարցը անընդհատ կքննվի և վեր կհանվի»:
Հարցազրույցն ամբողջությամբ՝ տեսանյութում:
