Այսօր՝ փետրվարի 14-ին, ԱԺ-ում շարունակվում է Կառավարության ծրագրի նախագծի քննարկումը:
«Լուսավոր Հայաստան» խմբակցության ղեկավար Էդմոն Մարուքյանը նախ անդրադարձավ մի քանի հնչեցված մտքերի. «Քննարկումն ընթանում է որոշակի անհանդուրժողականության մթնոլորտում. ես զարմանում եմ՝ շատ քիչ առաջ ընդդիմադիր ուժը իշխանություն դառնալով՝ ոնց է այդքան արագ դառնում անհանդուրժողական ընդդիմության նկատմամբ: Ես զարմանում եմ, թե այդքան կարճ ժամանակաընթացքում ոնց են մարդիկ սկսում ձեռ առնելով, տարբեր ոճաբանական, նեյրոլինգվիստիկ ինչ-որ բաներով շեղել քննարկումը կամ փորձել ձեռ առնել քաղաքական մրցակիցներին, բայց ոչ՝ հակառակորդներին»:
Պատգամավորը հիշեցրեց աստվածաշնչյան խոսքը. «Գայթակղություն լինելու է, բայց վայ նրան՝ ում միջոցով կլինի». «Գայթակղություն կար չափն անցնելու, և կային նաև անցնողներ»:
Էդմոն Մարուքյանի խոսքով՝ 90-ականներին իրենց աղքատության մեղավորը Լևոն Տեր-Պետրոսյանն էր, 2000-ականներին՝ Ռոբերտ Քոչարյանը, 2018-ին՝ Սերժ Սարգսյանը. «Այսինքն՝ մեզ այդպես էին սովորեցրել: Եվ ահա գալիս է հեղափոխությունը և հայտարարում, որ հեղափոխությունը մարդկանց գլուխներում է. դուք պետք է հաղթահարեք աղքատությունը: Սրանում կան շատ կարևոր թեզեր, բայց առաջ է գալիս երկրորդ հարցը՝ բա կառավարիչները ի՞նչ են անելու, կամ ինչու էին նախորդ երեքը՝ մեղավոր, իսկ չորրորդն ասում է՝ ես մեղավոր չեմ: Այսինքն՝ կա հերոս և անտիհերոս»:
Նա ընդգծեց՝ այդպես կարող է լինել, երբ տրվի ազատություն. «Բայց այդ ազատությունը չի կարող տրվել ելույթներով, ասելով, թե կոռուպցիա չկա»:
Էդմոն Մարուքյանը նշեց, որ չի կարելի եղած հեղափոխությունը անընդհատ երեսով տալ. «Փաշինյանն այդքան չի խոսում հեղափոխության մասին, որքան երեսով են տալիս այն մարդիկ, ովքեր կապ չունեն հեղափոխության հետ և պարզապես բախտի քմահաճույքով դասավորված են հեղափոխության շարքերի մեջ: Նրանք իջեցնելով դեբատի սանդղակը՝ խոսում են մեր գործընկերոջ քթից: Բայց մենք ներողամիտ ենք՝ նոր են, անփորձ են»:
Դիմելով ԿԳ նախարարին՝ Էդմոն Մարուքյանն ասաց. «Էդմոն Մարուքյանի համար պետք է աշխատեք, որովհետև Էդմոն Մարուքյանը ՀՀ քաղաքացի է», և ներկայացրեց փաստեր Ագրարային համալսարանում հովանավորչության մասին. «Դուք գիտեք կաշառքը միայն տալ-վերցնե՞լն է»:
Մանրամասները՝ տեսանյութում:
