Մի շարք հասարակական կազմակերպություններ հանդես են եկել հայտարարությամբ, որում մասնավորապես ասվում է. «Երեկ` փետրվարի 12-ին, երեկոյան ժամը 19։00-ի սահմաններում, Երևանի Մաշտոցի պողոտայում մի խումբ ոստիկաններ խոչընդոտել են «Չորրորդ իշխանություն» օրաթերթի թղթակից Անի Գևորգյանի և «iLur.am» լրատվական կայքի օպերատոր Սարգիս Գևորգյանի գործունեությանը և, բիրտ ուժ կիրառելով, նրանց բերման ենթարկել ոստիկանության Կենտրոնի բաժին։
Լրագրողը և օպերատորը պողոտայում էին գտնվում՝ մարտի 1-ին կայանալիք հանրահավաքի մասին Հայ ազգային կոնգրեսի ակտիվիստների կողմից իրազեկման թռուցիկներ բաժանելը լուսաբանելու նպատակով։ Երբ այնտեղ ընդհարում է տեղի ունեցել ակտիվիստների և նրանց ակցիան խափանող մի խումբ երիտասարդների միջև (վերջիններիս թվում էին երիտասարդ ՀՀԿ-ականներ, ՀայաստանիԱգրարային համալսարանի ուսխորհրդի նախագահն ու անդամը), դեպքի վայր ժամանած ոստիկանները, միջադեպի մասնակիցներին բերման ենթարկելիս, փորձել են Անի Գևորգյանի և Սարգիս Գևորգյանի ձեռքերից խլել տեսախցիկները։ Քանի որ վերջիններս համառություն են ցուցաբերել և չեն տվել իրենց սարքերը, նրանց նույնպես բերման են ենթարկել։
Անի Գևորգյանի խոսքով` մեքենայի մեջ ոստիկանները շարունակել են հարվածել իր ձեռքերին։ Իսկ արդեն Կենտրոնի բաժնում քաղաքացիական հագուստով մի անձ (լրագրողի վկայութամբ` հենց այդ բաժնի պետ Արտակ Պողոսյանը), նկատելով, որ Անի Գևորգյանը հեռախոսով հարցազրույց է տալիս, ապտակել է նրան ու ձեռքից խլել հեռախոսը։ Մեկ այլ սենյակում մի քանի ոստիկան, հայհոյանքներ հնչեցնելով, ուժ են կիրառել օպերատոր Սարգիս Գևորգյանի նկատմամբ։ Ավելի ուշ, անտեսելով փաստաբան հրավիրելու պահանջը, և՛ լրագրողին, և՛ օպերատորին խուզարկության են ենթարկել, վերցրել-տարել են տեսախցիկները, իսկ երբ վերադարձրել են, պարզվել է, որ նկարահանված կադրերը ջնջված են։ Անի Գևորգյանն ու Սարգիս Գևորգյանն ազատ են արձակվել երեկոյան 22։30-ի մոտակայքում։
Մենք` ներքոստորագրյալներս, հաշվի առնելով, որ վերջին տարիներին հաճախադեպ են դարձել հենց ոստիկանների կողմից լրագրողների իրավունքների խախտումները, նրանց օրինական մասնագիտական գործունեության խոչընդոտումները, պահանջում ենք՝
ՀՀ դատախազությունից՝ սույն հայտարարությունը, ինչպես և մամուլի բազմաթիվ հրապարակումները, դիտել որպես հաղորդում հանցագործության մասին,
ՀՀ ոստիկանության ղեկավարութունից՝ հարուցել ծառայողական քննություն՝ պարզելու Կենտրոնի բաժնի պետի և նրա ենթակաների գործողությունների համաչափությունը և որոշելու նրանց հետագա պաշտոնավարման նպատակահարմարությունը։
ՀՀ ոստիկանությանը նաև կոչ ենք անում անհրաժեշտ միջոցներ ձեռնարկել համակարգում նման ապօրինի արարքները բացառելու ուղղությամբ։
Խոսքի ազատության պաշտպանության կոմիտե
Երևանի մամուլի ակումբ
Բազմակողմանի տեղեկատվության ինստիտուտ – Հայաստան
«Լրագրողներ հանուն ապագայի» ՀԿ
Հայաստանի Հելսինկյան կոմիտե»:
