Իզմիրի Գեդիզլի համալսարանի ինժեներական ֆակուլտետի ուսանողները նախագծել են մեքենա, որը կարող է 1000 կմ ճանապարհը հաղթահարել ընդամենը 1 լիտր բենզինով: Ինչպես հայտնում է Anadolu գործակալությունը՝ այդ հիբրիդային մեքենան դարձել է նախկին մշակումների զարգացման նոր փուլ:
Ինժեներներն ակնկալում են, որ հետագայում կկարողանան կատարելագործել շարժիչը, որը մեքենային թույլ կտա 1 լիտր վառելիքով 5000 կմ ճանապարհ անցնել:
Թուրք ուսանողների մշակած տեխնոլոգիայի հիմքում մանրակրկիտ հավասարակշռությունն է արևային էներգիայի, էլեկտրաէներգիայի, բենզինի սպառման և էներգիայի վերականգնման համակարգի միջև: Այդ հավասարակշռությունը թույլ է տալիս նվազագույնի հասցնել ածխաջրածնային վառելիքի կիրառումը:
Ուսանողական թիմի աշխատանքը նկատել են SHELL ECO-MARATHON բենզինային ավտոնախատիպերի մրցույթի կազմակերպիչները: Նրանք հրավիրել են թուրք ուսանողներին մասնակցել մրցույթին, որը կանցկացվի Հոլանդիայում՝ մայիսի կեսերին: Մարաթոնին հասցնելու համար ուսանողներն անցել են մեքենայի հավաքմանը: Մարաթոնին նրանք կպայքարեն 26 երկրների 229 թիմերի դեմ:
