Հայաստանում կհիմնվի Բջջային կիրառական լուծումների առաջին տարածաշրջանային լաբորատորիան (mLab ECA)` Արևելյան Եվրոպայի, Հարավային Կովկասի և Կենտրոնական Ասիայի երկրների համար: Նախագծի պատասխանատուն Ձեռնարկությունների ինկուբատոր հիմնադրամն է (ՁԻՀ)։ Ինչպես «Առաջին լրատվական»-ին հայտնեց ՁԻՀ տնօրեն Բագրատ Ենգիբարյանը, Համաշխարհային բանկը, Ֆինլանդիայի կառավարությունը և «Nokia» ընկերությունը համատեղ աշխարհում բացում են 5 լաբորատորիաներ, որոնցից 2-ն՝ Աֆրիկայում, 1-ը՝ ԱՊՀ տարածքում (բացի Ռուսաստանից), 2-ն՝ Ասիայում։
«Սա կխթանի բջջային լուծումները և դրա շնորհիվ աշխարհի այն մասերում, որտեղ ինտերնետը հասանելի չէ, հնարավորություն կստեղծվի շատ հարցեր լուծել հեռախոսի միջոցով։ Google-ի, Microsoft-ի, Apple-ի, Nokia-ի կողմից այդ ուղղությամբ շատ լուրջ գործընթացներ են ծավալվում, և շուտով մոբայլ լուծումները կսկսեն շատ մեծ դերակատարություն ունենալ։ Փորձելու ենք բջջային լուծումներ տրամադրող կազմակերպությունների հետ տարածաշրջանում միջավայր ստեղծել, որտեղ ծրագրավորողներն ու տարբեր մասնագետներ լուծումներ կմշակեն տնտեսության տարբեր ոլորտների համար»,- ասաց Բ. Ենգիբարյանը՝ հավելելով, որ այդ լուծումներն աշխարհում շատ մեծ կիրառություն ունեն գյուղատնտեսության, կրթության և այլ բնագավառներում։
Բջջային կիրառական լուծումների լաբորատորիան 2 հիմնական նպատակ է ունենալու՝ Հայաստանում մասնագետներ պատրաստել և լուծումներ մշակել, կոորդինացնել ամբողջ գործունեությունն ԱՊՀ-ում։ Ներկայում ակտիվ աշխատանքներ են տարվում Վրաստանի, Մոլդավիայի, Ուկրաինայի և Ղազախստանի հետ՝ այդ երկրներում ներկայացուցիչներ ունենալու ուղղությամբ։
«Աստիճանաբար աշխարհագրությունը կմեծացնենք, և 11 երկրներն էլ ակտիվ կմասնակցեն նախագծին, կօգնենք, որ իրենց մասնագետներն էլ վերապատրաստվեն և կոնկրետ լուծումներ մշակվեն ոչ միայն սմարթֆոնների, այլև սովորական հեռախոսների համար, որովհետև աշխարհի բնակչության մեծ մասը սմարթֆոնների հնարավորություն չունի, ինչպես նաև հեռախոսի միջոցով լայնաշերտ ինտերնետի մուտք չունի»,- նկատեց Բ. Ենգիբարյանը։
Նախատեսվում է, որ mLab ECA-ն կսկսի աշխատել արդեն այս տարվա ընթացքում:
