Հունիսի 21-24-ը Փարիզում տեղի է ունեցել Ուղղափառների միջխորհրդարանական վեհաժողովի 18-րդ գլխավոր վեհաժողովը, որտեղ Հայաստանի Ազգային ժողովի պատվիրակությունը ներկայացրել է բանաձև «Օսմանյան կայսրության քրիստոնյա ժողովուրդների՝ հայերի, հույների և ասորիների նկատմամբ իրականացրած ցեղասպանության վերաբերյալ», որին վեհաժողովի 28 մասնակիցները միաձայն կողմ են քվեարկել: Վեհաժողվի հայաստանյան պատվիրակության անդամներ, ՀՀԿ պատգամավոր Մկրտիչ Մինասյանը և ՀՅԴ պատգամավոր Ռուզան Առաքելյանն այսօր լրագրողների հետ հանդիպման ժամանակ ներկայացրին վեհաժողովի արդյունքները:
Մկրտիչ Մինասյանը նշեց, որ Ուղղափառների միջխորհրդարանական վեհաժողովը երրորդ միջազգային կառույցն է Եվրախորհրդից և Եվրախորհրդարանից հետո, որը ճանաչել և դատապարտում է Հայոց ցեղասպանությունը:
Մինասյանը տեղեկացրեց, որ վեհաժողովի անդամ չեն Ադրբեջանը և Թուրքիան, որովհետև այնտեղ ուղղափառ պատգամավորներ չկան։ «Սա լուրջ քաղաքական կառույց է և այստեղ կայացրած որոշմանը պետք է հետևեն այլ քաղաքական քայլեր,այս որոշումը գնալու է ՄԱԿ և աշխարհի գրեթե բոլոր երկրների խորհրդարաններ: Հուսով եմ, որ այս գործընթացը շարունակվելու է, դա ոչ աշխարհի սկիզբն է, ոչ էլ վերջը»,- նշեց Մկրտիչ Մինասյանը:
ԱԺ ՀՅԴ խմբակցության անդամ, պատվիրակության ներկայացուցիչ Ռուզան Առաքելյանը հավելեց, որ սա Ցեղասպանության ճանաչման գործում մի քայլ առաջ էր, և մենք պետք է նման հանգրվանային փուլերով հասնենք վերջնական նպատակին՝ Թուրքիայի կողմից Հայոց ցեղասպանության ճանաչմանը:
